Тайланд даирилири түрмидин қачқан уйғурларни җиддий издимәктә

Мухбиримиз әзиз
2017-11-21
Share

20-Ноябирда тайландниң соңкла өлкисидики чеграға йеқин болған бир йиғивелиш мәркизидин 20 уйғур қечип кәткәндин кейин бу вәқә тайланд вә хитай даирилирини пат-парақ қиливәткән.

Тайландтики әң чоң гезитләрдин болған "дөләт" гезитиниң 21-ноябирдики хәвиридә ейтилишичә, тайланд баш сақчи мәһкимиси уйғур мәһбуслар қачқан йиғивелиш орниниң алтә сақчи әмәлдарини "мәсулийәт тәкшүрүши" үчүн чақиртип кәткән. 

Ройтерс агентлиқиниң 21-ноябирдики хәвиридә ейтилишичә, хитай һөкүмити тайланд һөкүмитидин "қечип кәткән 20 уйғурни тездин ‹адаләт соти' ға қайтуруп келиш" ни тәләп қилған. Ройтерсниң тайланд сақчи даирилиридин нәқил кәлтүрүшичә, нөвәттә бу уйғурлардин 5 киши тутулған болуп, 15 уйғур давамлиқ қечип йүрмәктә икән. 

Тайланд даирилири буниңдин илгири хитай тәрәп: "бу уйғурлар әсәбий диний тәшкилатларға қатнишиш үчүн атланғанлар" дегән пикиргә қошулмайдиғанлиқини, чүнки бу уйғурларниң һечқандақ қораллиқлар гуруһиға бағлинишлиқ әмәсликини илгири сүргән. Тайландниң чулараҗмонти райондики мусулманларниң лидери, доктор висут бинлатиһ бу һәқтә сөз қилип: "қачқан уйғурлар хотун-балилири билән җәм болуш үчүн қачти" дегән. Ройтерсниң хәвиридә ейтилишичә, уйғур миллий һәрикитиниң рәһбири рабийә қадир ханим бу һәқтә баянат елан қилип: "бу уйғурлар хитай һөкүмитиниң зиянкәшлики сәвәбидин шәрқий җәнубий асияға қечишқа мәҗбур болғанлар" дегән. 

Мәлум болушичә, шәрқий җәнубий асиядики қачқунлуқ сәпиридә тайландта қолға елинған уйғурлардин һазирғичә һечнәгә кетәлмәй, тайландниң йиғивелиш мәркәзлиридә туруватқан 61 нәпәр уйғур бар икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт