Tayland emeldarliri tayland teripidin xitaygha qayturulghan Uyghurlarni ziyaret qilghan

Taylandning mu'awin bash ministiri, qoshumche dölet mudapi'e ministiri wachayachay bilen edliye ministiri tawé sodsong bashchiliqidiki tayland hökümet wekiller ömiki 19-mart charshenbe küni etigende qeshqerge yétip bérip, bu yil 27-féwral taylandtin xitaygha qayturulghan Uyghurlarning ehwalini tekshürüshni bashlighan.

Tayland “Millet”gézitining xewer qilishiche, tayland wekiller ömikini xitayning mu'awin j x ministiri shü datong kütüwalghan, shundaqla xitay j x ministirliqining “Kündilik ishliri” gha mes'ul mu'awin ministiri chi yenjün bilen bu qétimqi ziyaret heqqide söhbet ötküzgen. Söhbette, xitay terep tayland wekiller ömikige taylandtin qayturulghan Uyghurlarning orunlashturulush ehwalidin melumat bergen. Nöwette, tayland wekiller ömikining 27-féwral xitaygha qayturulghan 40 Uyghurdin kimler bilen uchrishidighanliqi melum emes.

“Millet”gézitining bildürüshiche, tayland hökümitining bayanatchisi jirayu, wekiller ömikining ikki guruppigha bölünüp, qeshqerdin 100 kilométir yiraqta olturushluq Uyghurlarning a'ilisige bérip ziyaret qilidighanliqi, her ikki guruppigha xitay j x ministirliqining hemrah bolidighanliqini éytqan. Tayland da'irilirining 11 yildin artuq waqittin buyan taylandta tutup turulghan 40 neper Uyghurni 27-féwral tuyuqsiz xitaygha qayturushi, kishilik hoquq teshkilatliri, b d t kishilik hoquq aliy komissari, musapirlar aliy komissari we yawropa parlaménti qatarliq orunlarning eyiblishige uchrapla qalmay, amérika hökümitining jazalishigha uchrighan.

Amérika tashqi ishlar ministirliqi Uyghurlarni qayturushta jawabkarliqi bar tayland emeldarlirigha wiza émbargosi qoyghanliqini élan qilghan. Halbuki, xewerlerde taylandning mu'awin bash ministiri wachayachayning 18-mart qeshqerge qarap yolgha chiqish aldida muxbirlargha, wekiller ömikining her bir Uyghurni yoqlishi mumkin emesliki, chünki ularning ariliqi bek yiraq ikenlikini, yoqliyalmighanlar bilen sin arqiliq alaqilishidighanliqini éytqanliqi bildürülmekte.

Melum bolushiche, tayland wekiller ömiki yene héytgah jamesini ziyaret qilish, yerlik musulman jama'etliri bilen uchrishish, Uyghurlar bilen ékran söhbiti ötküzüsh, Uyghur aptonom rayonluq partkomning sékrétari ma shingrüy bilen körüshüsh, qeshqer méhmanxanisida kechlik kütüwélish ziyapitige qatnishish qatarliq pa'aliyetlerge uyushturulghan iken. Halbuki, nöwette bu tayland kishilik hoquq teshkilatliri teripidin xitayning “Shinjang siyasiti” ni aqlash herikitining bir parchisi bolush bilen eyiblenmekte.