Tayland saqchi da'iriliri: "Qéchip ketken Uyghurlar héch bir döletke bériwétilmeydu"

Muxbirimiz shöhret hoshur
2017-11-22
Share

Bügün tayland saqchi da'iriliri bayanat bérip, eger qamaqxanidin qéchip ketken Uyghurlar tutulghan teqdirde héchqandaq bir döletke bériwétilmeydu, dégen.

Firansiye axbarat agéntliqining bu heqtiki xewiride bayan qilinishiche, tayland köchmenler idarisining qamaqxanisidin düshenbe küni tamni téship we ediyallirini arqan qilip turup qéchip ketken 25 neper Uyghur tutqundin 5 nepiri tayland saqchiliri teripidin aldinqi küni tutulghan. Ulardin yene bir nepiri bügün tutulghan.

Xitay da'iriliri tünügün tayland hökümitidin qamaqxanidin qéchip ketken Uyghurlar tutulghanda ularni xitaygha qayturup bérishini telep qilghan idi. Tayland saqchi da'irilirining yardemchi bayanatchisi krissana patanacharon bügün muxbirlargha qilghan sözide tutulghan Uyghurlarni herqandaq bir döletke bériwetmeydighanliqini we ilgiri ulargha qarita élip bériwatqan kimlik éniqlash tekshürüshini dawamlashturidighanliqini éytqan.

Tayland da'iriliri 2014 yili tutqun qilghan 200 din artuq Uyghurning aldinqi yilliri bir qismini xitaygha qayturup bergen we bir qismining türkiyege kétishige yol qoyghan. Nöwette az dégende 60 che Uyghurning tayland köchmenler idarisining qamaqxanisida tutup turuluwatqanliqi xelq'ara jama'etke melum. 

Firansiye axbarat agéntliqining bügünki xewiride Uyghur musulmanlirining xitayda éghir bésimgha uchrighanliqi üchün xitaydin qéchishqa mejbur bolghanliqi tilgha élin'ghan. Xewerde yene ularning qéchish sepiride taylandta tutulup qalghanliqi, bu jeryanda ularning kimlik mesilisi, yeni dölet teweliki mesilisining otturigha chiqqanliqi eskertilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.