Тайландта сиясий панаһлиқ тилигән хитай пуқралири җиддий қутқузуш мураҗиәт хети елан қилди

Мухбиримиз меһрибан
2015-07-14
Share

Тайланд һөкүмәт даирилириниң 109 нәпәр уйғурни “чеградин қанунсиз киргән” дегән баһанидә хитайға қайтуруп бериши һәр хил сәвәбләр түпәйлидин хитайдин тайландқа қечип чиқип, б д т ниң тайландтики ишханисидин сиясий панаһлиқ тилигән хитай пуқралирини әнсирәтти.

14-Июл сәйшәнбә күни чәтәлләрдики хитай демократлири торидин бошүндә “тайландтики хитай мусапирлириниң җиддий қутқузуш мураҗәтнамиси” намидики хәт елан қилинди.

Мураҗиәт хетидә мундақ дейилгән: “2015-йили 8-июл күни тайланд һөкүмити хәлқара мусапирлар қануниға хилап һалда 109 нәпәр уйғурни һаяти хәвпкә учраш еһтимали юқири болған хитайға қайтуруп бәрди. Хитай компартийисиниң тәшвиқат қораллири бу уйғурларни “террорлуқ гумандари”, “түркийә арқилиқ сүрийәдә қурулған ислам дөлитигә берип җиһад урушиға қатнашмақчи болғанлар” дәп елан қилди. Һазир бу уйғурларни еғир җазалар күтүп турупту. Бу вәзийәт тайландқа қечип чиқип б д т мусапирлар ишханисидин панаһлиқ тиләп ахирқи қарарни күтүватқан бизни қаттиқ чөчүтти. Биз хәлқара җәмийәтниң нөвәттә тайланд һөкүмитиниң бу дөләттә сиясий панаһлиқини сақлаватқан хитай пуқралирини коммунист хитай дөлитигә қайтуруп беришини тосушини мураҗиәт қилимиз” дейилгән.

Бошүндә елан қилинған бу һәқтики хәвәрдә дейилишичә, тайландта сиясий панаһлиқини сақлаватқан хитай пуқралири арисида “тайланд 109 уйғурни хитайға қайтуруп бәргәндин кейин, әмдики нөвәттә, тайландта б д т дин сиясий панаһлиқ тилигән башқа хитай пуқралирини йәни хитай һөкүмитигә қарши кишилик һоқуқ паалийәтчилири, хитай христиан муритлири вә фалүнгоң муритлири қатарлиқларниму хитайға қайтуруп беришкә тәйярлинипту” дегән хәвәр тарқалған. Нәтиҗидә тайландта қанунсиз туруватқан хитай пуқралири өз бихәтәрликидин әндишигә чүшкән вә сәйшәнбә күни бу мураҗәтни елан қилип, хәлқара җәмийәтни б д т ниң тайландтики мусапирлар ишиханисидин сиясий панаһлиқ тилигән хитай пуқралириниң әһвалиға көңүл бөлүшкә чақирған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт