Тайланд һөкүмитиниң хоңкоңлуқ паалийәтчини чеградин қайтуруветиши уйғур мусапирларни әскә салди

Мухбиримиз ирадә
2016-10-06
Share

Хоңкоңдики “күнлүк инқилаби” дәп нам берилгән зор көләмлик оқуғучилар намайишниң йетәкчилиридин бири болған җошуа ваңниң тайландқа киргүзүлмәй хоңкоңға қайтурулуш вәқәси өткән йили тайландтин хитайға қайтуруп берилгән 100 нәпәр уйғур мусапирниң мәсилисини қайтидин мәтбуатларниң күн тәртипигә елип кәлди.

Бүгүн, вал ситрит журнили, гардиян гезити, куартиз журнили қатарлиқ гезит-журналлар һәммиси елан қилған хәвәрлиридә “тайланд һөкүмитиниң худди хитайниң буйруқ бәҗа кәлтүргүчиси” гә охшап қалғанлиқини билдүрүшти.

Хәвәрләрдә, тайланд һөкүмитиниң өткән йили хитайниң тәлипигә бинаән тайландта панаһлинип туруватқан 100 нәпәр уйғур мусапирни хитайға қайтуруп бәргәнликини, һазир бу уйғурларниң ақивитиниң ениқсиз икәнликини билдүрүшти. Улар шундақла юқиридики бу вәқәләр хитай һөкүмитиниң җәнубий асиядики дөләтләр үстидики бесим вә тәсириниң қанчилик дәриҗидә зорийип кәткәнликини көрситип бериду, деди.

Хәлқара кәчүрүм тәшкилатиниң асия ишлири директори николас бикулин куартизға қилған сөзидә, 2008- вә 2009-йиллири уйғур ели вә тибәттә йүз бәргән вәқәләрдин кейин хитайға қошна әлләргә җенини елип қечиватқан уйғурлар вә тибәтләрниң көпәйгәнлики, шуниң билән тәң, хитай һөкүмитиниңму бу дөләтләргә қаратқан бесимини зорайтқанлиқини ейтқан.

Җошуа ваң әслидә тәклипкә бинаән тайландики бир университетқа нутуқ сөзләш үчүн йолға чиққан болуп, тайланд чегра даирилири сәвәб көрсәтмәй турупла униң тайланд чеграсидин киришигә йол қоймиған иди. Вәқәдин кейин тайланд чегра сақчи бөлүминиң муавин башлиқи прутипоң ваңниң хитайниң тәлипи билән қара тизимликкә киргүзүлгәнлики вә шу сәвәбтин чеградин киргүзүлмигәнликини ейтқан. Бирақ у кейин бу сөзидин тенивалған. Кейин тайланд һөкүмитиму буни рәт қилип, өзлириниң буни хитайдин “биваситә буйруқ” елип қилмиғанлиқини, пәқәт йүз бәргүси сиясий көңүлсизликләрниң алдини елиш үчүн қилғанлиқини илгири сүргән иди.

Тайланд даирилириниң бу һәрикити хәлқарадики кишилик һоқуқ органлириниң күчлүк тәнқидигә учриди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт