4 Йилдин бери тайланд түрмисидә тутуп турулуватқан уйғур мусапир билал вапат болған

Мухбиримиз ирадә
2018-08-02
Share

Мәлум болушичә, төт йилдин бери тайланд түрмисидә тутуп турулуватқан уйғур мусапирлиридин билал 1-авғуст күни кесәллик сәвәби билән вапат болған. Бу хәвәр хәвәр иҗтимаий таратқулар арқилиқ тарқалғандин кейин, чәтәлләрдики уйғур җамаитини чоңқур қайғуға чөмдүрди.

Билал уйғур 2014-йили хитайдин қечип чиқип тайландқа киргәндә «чеградин қанунсиз киргән» дегән җинайәт билән қолға елинған вә тайландниң һайтай дегән йеридә түрмигә ташланған. 4 Йилдин бери тайланд түрмисидә тутуп турулуватқан билалниң қан ракиға гириптар болғанлиқи өткән йили ениқланған. Түрмә шараитида йетәрлик давалинишқа еришәлмигән билал бәхткә қарши 2018-йили 1-авғуст күни җан үзгән. 

Бу қайғулуқ хәвәр ашкариланғандин кейин, шәрқий-җәнубий асиядики дөләтләрдә йилларчә тутуп турулуватқан уйғур мусапирлириниң ақивити йәнә бир қетим күчлүк әндишә пәйда қилди. Дуня уйғур қурултийиниң баянатчиси дилшат ришит бүгүн, йәни 2-авғуст радийомиз зияритини қобул қилип, бирләшкән дөләтләр тәшкилати кишилик һоқуқ комитети билән мусапирлар мәһкимисини һәм шундақла ғәрб демократик әллирини шәрқий-җәнубий асия әллиридә йилларчә тутуп турулуватқан уйғур мусапир тутқунларниң балдуррақ 3-бир дөләткә орунлишиши үчүн күч чиқиришқа чақирди. 

Тайланд һөкүмити 2013‏-вә 2014‏-йиллири хитайниң сиясий бесимидин қечип тайланд арқилиқ түркийәгә маңған нурғун уйғур мусапирлирини тутқун қилған иди. Тайланд һөкүмити әйни вақитта өзлириниң түрк пуқраси икәнликини илгири сүргән уйғур мусапирларниң бир қисминиң түркийәгә кетишигә йол қойған болсиму, бирақ 2015-йили 100 дин артуқ уйғурни хитайға өткүзүп берип, б д т мусапирлар мәһкимиси вә кишилик һоқуқ тәшкилатлириниң қаттиқ тәнқидигә учриған иди. 

Мәлум болушичә, һазирғичә һечйәргә кетәлмәй тайландниң йиғивелиш мәркәзлиридә тутуп турулуватқан уйғур мусапирлардин йәнә 61 нәпири бар икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт