Тайланд сақчи тәрәп баңкоктики партлаш вәқәсидә қолға елинған гумандарниң иқрар қилғанлиқини билдүргән

Мухбиримиз қутлан
2015.09.07
Share on WhatsApp
Share on WhatsApp

Бирләшмә агентлиқниң хәвиригә қариғанда, тайланд сақчи даирилири бүгүн, йәни 7-сентәбир баянат берип, баңкоктики партлаш вәқәсигә четишлиқ дәп қолға елинған икки гумандардин бириниң “иқрар” қилғанлиқини билдүргән.

Тайланд дөләтлик сақчи идарисиниң баянатчиси правут таворнсери бу һәқтә мухбирларға баянат берип мундақ дегән: “гумандар йүсүп мирәли өткән һәптә камбоджа чеграсиға йеқин җайда қолға чүшти. Биз уни җинайи җавабкарлиқ бойичә сорақ қилғинимизда, у өз җинайитини иқрар қилди.”

Тайланд сақчи тәрәп өткән һәптә гумандар йүсуп мирәлиниң хитай паспорти билән қолға елинғанлиқини, униң паспортида туғулған җайниң “шинҗаң” дәп йезилғанлиқини тилға алған иди. Һалбуки, тайланд сақчи тәрәп бүгүн мухбирларға бәргән баянатида “иқрар қилди” дәп елан қилған гумандар йүсүп мирәлиниң дөләт тәвәлики һәққидә һечқандақ еғиз ачмиған.

Мәлумки, 17-авғуст баңкокта партлаш йүз берип 20 киши өлгәндин кейин тайланд сақчи тәрәп мәзкур вәқәниң уйғурларға четилиш еһтималлиқини чәткә қақмайдиғанлиқини тилға алған иди.

Тайланд сақчи тәрәпниң әйни чағда һечқандақ дәлил-испат болмиған әһвалда мәзкур вәқәни уйғурларға бағлиши җамаәтчиликтә күчлүк гуман пәйда қилған иди. Бүгүнки күндә тайланд сақчи тәрәпниң гумандарниң “иқрари” һәққидики интайин зиддийәтлик баянлири техиму зор шүбһә қозғимақта.

Көзәткүчиләр вә мустәқил сиясий анализчилар мәзкур дело һәққидә тайланд билән хитайниң мәхпий иш бирлики елип бериш мумкинчиликини илгири сүрмәктә. Улар, әгәрдә баңкоктики партлашниң җавабкарлиқи уйғурларға артилса тайланд 109 нәпәр уйғур мусапирни хитайға қайтурғанлиқи сәвәбидин келип чиққан хәлқара бесимдин қутулиду; хитай болса уйғурларни мувәппәқийәтлик һалда хәлқараға “террорчи” қилип көрситиш мәқситигә йетиду, дегәнләрни тәкитлимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт