Малайшияниң муавин баш министири: “тайландтин қачқан уйғурларниң изи техи байқалмиди”

Малайшияниң муавин баш министири әхмәт заһит һәмиди бүгүн тайландтин малайшияға қечип өткәнлики илгири сүрүлүватқан уйғурлар һәққидә баянат елан қилған. У, бу һәқтә тайландтин учур тапшурувалғанлиқини вә тегишлик һәрикәткә өткәнликини, әмма һазирға қәдәр малайшияға қечип кәлгән уйғурларниң изини байқимиғанлиқини билдүргән.

У йәнә мәзкур уйғурларниң малайшияға қечип кәлгәнликиниң техи дәлилләнмигәнликини ейтқан. Заһиди мухбирларға қилған сөзидә йәнә “бизниң һәрқандақ бир террорлуқ һәрикәтлириниң изини қоғлап тәкшүрәләйдиған механизимимиз бар,” дегән. “әркин малайшия хәвәр тори” ниң бу һәқтики хәвиридә баян қилинишичә, заһиди йәнә “әгәр мәзкур уйғурлар малайшияда болса, биз уларни қандақ қилип тутушни билимиз, биз һазир асиядики сақчи органлири вә хәлқара сақчи оргини билән бу иш үстидә йеқиндин һәмкарлишиватимиз,” дегән. 

Мәзкур хәвәр ториниң бүгүнки хәвиридә йәнә тайландниң малайшия билән тутушидиған җайидики садав көчмәнләр қамақханисида тутуп турулуватқан 20 нәпәр уйғурниң хитайға қайтурулуш хәвпигә дуч кәлгәнлики үчүн дүшәнбә күни кечә саәт 2 дә қамақханидин қечип чиқип кәткәнлики йезилған. 

Дуня уйғур қурултийиниң алий рәһбири рабийә қадир ханим мәзкур вәқә йүз бәргән күнила баянат елан қилип, тайланд вә шәрқий-җәнубий асия дөләтлирини мәзкур уйғурларни тутқан әһвалда хитайға қайтурмаслиққа вә хәлқара қанун бойичә бир тәрәп қилишқа чақириқ қилған иди.