Malayshiyaning mu'awin bash ministiri: "Taylandtin qachqan Uyghurlarning izi téxi bayqalmidi"

Muxbirimiz shöhret hoshur
2017-11-22
Share

Malayshiyaning mu'awin bash ministiri exmet zahit hemidi bügün taylandtin malayshiyagha qéchip ötkenliki ilgiri sürülüwatqan Uyghurlar heqqide bayanat élan qilghan. U, bu heqte taylandtin uchur tapshuruwalghanliqini we tégishlik heriketke ötkenlikini, emma hazirgha qeder malayshiyagha qéchip kelgen Uyghurlarning izini bayqimighanliqini bildürgen.

U yene mezkur Uyghurlarning malayshiyagha qéchip kelgenlikining téxi delillenmigenlikini éytqan. Zahidi muxbirlargha qilghan sözide yene "Bizning herqandaq bir térrorluq heriketlirining izini qoghlap tekshüreleydighan méxanizimimiz bar," dégen. "Erkin malayshiya xewer tori" ning bu heqtiki xewiride bayan qilinishiche, zahidi yene "Eger mezkur Uyghurlar malayshiyada bolsa, biz ularni qandaq qilip tutushni bilimiz, biz hazir asiyadiki saqchi organliri we xelq'ara saqchi orgini bilen bu ish üstide yéqindin hemkarlishiwatimiz," dégen. 

Mezkur xewer torining bügünki xewiride yene taylandning malayshiya bilen tutushidighan jayidiki sadaw köchmenler qamaqxanisida tutup turuluwatqan 20 neper Uyghurning xitaygha qayturulush xewpige duch kelgenliki üchün düshenbe küni kéche sa'et 2 de qamaqxanidin qéchip chiqip ketkenliki yézilghan. 

Dunya Uyghur qurultiyining aliy rehbiri rabiye qadir xanim mezkur weqe yüz bergen künila bayanat élan qilip, tayland we sherqiy-jenubiy asiya döletlirini mezkur Uyghurlarni tutqan ehwalda xitaygha qayturmasliqqa we xelq'ara qanun boyiche bir terep qilishqa chaqiriq qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.