Җуңғар ойманлиқидин йәнә 415 милйон тонна нефит записи байқалған

Мухбиримиз ирадә
2019-01-03
Елхәт
Пикир
Share
Принт

Хитай хәвәрләр ториниң 3-январ күни тарқатқан хәвиригә қариғанда, хитай нефит ширкити 2018-йили ичидә җуңғар ойманлиқидики савән вә маху районлиридики йәр қатлимида омумий нефит записи 415 милйон тонниға йетидиған ғайәт зор бир нефитликни байқиған.

Хәвәрдә дейилишичә, бу һазирғичә җуңғар ойманлиқидин байқалған әң зор нефит записи болуп һесаблинидикән.

Хитайниң шинхуа агентлиқи техи алдинқи айда тарқатқан бир хәвиридә тарим ойманлиқидин 100 милярд куб метирлиқ тәбиий газ записиниң байқалғанлиқини хәвәр қилған иди.

Мәлум болушичә, ғәрбий-шимал нефитлики тәвәсидин қезиливатқан тәбиий газниң йиллиқ қезилиш миқдари тоққуз йилдин буян изчил 1.4 Милярд куб метирдин артуқ болуп кәлмәктә икән.

Алақидар материялларда көрситилишичә, хитай һөкүмити «ғәрбни кәң көләмдә ечиш» шоари астида уйғурлар диярида тәбиий газ байлиқлирини қезиш көлимини тез сүрәттә кеңәйткән. 2005-Йилидин буян қезилған тәбиий газниң омуми миқдари 19 милярд куб метир икән. Бу газниң 14 милярд куб метири сетилған болуп, уйғур дияри хитай өлкилириниң асаслиқ тәбиий газ мәнбәси болуп кәлмәктикән.

Уйғур анализчилар бу һәқтә пикир баян қилип, хитай һөкүмитиниң һәдәп уйғур елидики көп қисим наһийә вә йезиларни «намрат» дәп тәшвиқ қилип кәлгәнликини, әмма уйғур дияридики йәр асти байлиқлириниң һәммисини дегүдәк хитай өлкилиригә тошуп кетиватқанлиқини тәкитлиди.

Пикирләр (0)
Share
Толуқ бәт