Уйғур елидики 8 тәбиий байлиқ кани ким ашти қилип сетилидикән

Мухбиримиз ирадә
2019-05-30
Share

30-Май күни, хитайниң шинхуа торида елан қилинған бир парчә хәвәрдин қариғанда уйғур районлуқ тәбиий байлиқлар назарити алдинқи күни уйғур районидики истратегийәлик кан байлиқлири чиқидиған 8 канниң ишлитиш һоқуқини хитай миқясида ким ашти қилип сетишқа чиқарған.

Хәвәрдә көрситилишичә, бу канлар ичидә ғәрбий коинлон малкансу маргантес кениму бар болуп, бу канниң йиллиқ ишләпчиқириш миқдари 10 миң тоннидин ашидиған болуп, уйғур елидики әң зор маргентс тәрәққият базиси болуп қалған икән.

Юқирида ким ашти қилип сетилған канлар мис, некил, қоғушун, силанетис, йәр иссиқлиқи вә башқилардин тәркиб тапқан болуп, бу канларниң сетилиш баһаси 800 милйон йүәндин башлиған.

Хәвәрдә ейтилишичә, уйғур аптоном район даирилири бундин аввал 9 көмүр кениниң ишләпчиқириш һоқуқини ким ашти қилип сетип болған.

Чәтәлләрдики көзәткүчиләр бу канларниң ким ашти қилип сетилиши дегәнлик уларниң хитай ширкәтлиригә өткүзүлидиғанлиқи, бу ширкәтләрниң ичкиридин хитай ишчиларни әкелип ишлитидиғанлиқидин дерәк беридиған болуп, булар һәммиси аптономийә қануниға хилап әһваллар икән. Мәлум болушичә, хитай һөкүмитигә тәвә карханилар вә ширкәтләр йиллардин буян уйғур елидә түрлүк тәбиий байлиқ канлирини ечиватқан болуп, бу хил канларда хизмәт қилидиған асаслиқ ишчилар вә техниклар йәрлик хәлқләрдин болмастин ички хитайдин елип чиқилған хитай ишчилар болуп кәлгән. Хитай ширкәтлири ечиватқан тәбиий газлиқлар, вә нефитликләрниң ишчи-хизмәтчилириниң мутләқ зор қисмини хитайлар игилигән. Ечиливатқан бу тәбиий байлиқлардин шу йәрдики аһалиләрниң нәп елиши чәклимигә учриған.

Көзәткүчиләрниң диққитини қозғиған йәнә бир мәсилә болса, муһит амили болуп, бу канларниң болупму силанетис канлириниң қезилишиниң адәттә муһитқа кәлтүридиған зийини интайин еғир болидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.