Уйғур дияриниң токини хитайға йөткәштә “тарихий рекорт” яритилған

Хитай һөкүмити башқурушидики “хитай хәвәр тори” ниң 30-авғусттики хәвиридә ейтилишичә, хитай даирилири шу күндики ахбарат елан қилиш йиғинида уйғур дияридин хитай өлкилиригә йәткүзүлгән ток миқдариниң 20 милйон киловатқа йәткәнликини, буниң билән уйғур дияриниң токини хитай өлкилиригә тошушниң тарихтики әң юғури рекорти яритилғанлиқини елан қилған.

Хәвәрдә ейтилишичә, уйғур дияриниң ток еһтияҗиға керәклик болған үч милйон киловатлиқ ток толуқ тәминлиниватқан болуп, ишләпчиқириш вә қурулушқа кәң-кушадә йетидикән. Ахбарат елан қилиш йиғинида уйғур аптоном районлуқ ток ширкитиниң баянатчиси лю венлоң әһвал тонуштуруп “нөвәттики вирус вабаси мәзгилидә ток билән тәминләш хизмити көплигән саһәгә берип тақишиду. Биз бу җәһәттики хизмәтләрни мукәммәл ишлидуқ” дегән. Шуниңдәк уйғур дияриниң токини йөткәш арқилиқ пүткүл хитайниң йеримиға йеқин даиридики ток еһтияҗини қамдиғанлиқини тәкитлигән.

Иҗтимаий таратқулардики учурлардин мәлум болушичә, хитайдики кәлкүн апити вә томуз иссиқи түпәйлидин хитайниң оттура вә шәрқий қисимлирида еғир дәриҗидә ток йетишмәслик келип чиққан. Бу зор еһтияҗ болса уйғур дияридин ғайәт зор миқдарда ток йөткәш арқилиқ һәл қилинған. Әмма бу токниң қандақ һасил қилинғанлиқи һәққидә учур берилмигән.

Һалбуки буниңдин бирнәччә күн илгири хитай дөләтлик енергийә ширкити уйғур дияридики көмүр қезиш хизмитидә 50 милйон тоннилиқ йеңи рекортниң яритилғанлиқини елан қилған болуп, бу һал нөвәттики хитай өлкилирини ток билән тәминләштә ишлитиливатқан токниң көмүрни көйдүрүш арқилиқ һасил қилиниватқан болуши мумкинликини алға сүрмәктә икән. Уйғур диярида өткән он нәччә йилда давам қилип кәлгән “көмүрни көйдүрүп газға айландуруш, андин ичкиригә йөткәш” қурулуши уйғур дияриниң муһитини ғайәт зор дәриҗидә хараб қилған ишларниң бири иди.