Uyghur diyarining tokini xitaygha yötkeshte “Tarixiy rékort” yaritilghan

Muxbirimiz eziz
2022.08.30
Share on WhatsApp
Share on WhatsApp

Xitay hökümiti bashqurushidiki “Xitay xewer tori” ning 30-awghusttiki xewiride éytilishiche, xitay da'iriliri shu kündiki axbarat élan qilish yighinida Uyghur diyaridin xitay ölkilirige yetküzülgen tok miqdarining 20 milyon kilowatqa yetkenlikini, buning bilen Uyghur diyarining tokini xitay ölkilirige toshushning tarixtiki eng yughuri rékorti yaritilghanliqini élan qilghan.

Xewerde éytilishiche, Uyghur diyarining tok éhtiyajigha kéreklik bolghan üch milyon kilowatliq tok toluq teminliniwatqan bolup, ishlepchiqirish we qurulushqa keng-kushade yétidiken. Axbarat élan qilish yighinida Uyghur aptonom rayonluq tok shirkitining bayanatchisi lyu wénlong ehwal tonushturup “Nöwettiki wirus wabasi mezgilide tok bilen teminlesh xizmiti köpligen sahege bérip taqishidu. Biz bu jehettiki xizmetlerni mukemmel ishliduq” dégen. Shuningdek Uyghur diyarining tokini yötkesh arqiliq pütkül xitayning yérimigha yéqin da'iridiki tok éhtiyajini qamdighanliqini tekitligen.

Ijtima'iy taratqulardiki uchurlardin melum bolushiche, xitaydiki kelkün apiti we tomuz issiqi tüpeylidin xitayning ottura we sherqiy qisimlirida éghir derijide tok yétishmeslik kélip chiqqan. Bu zor éhtiyaj bolsa Uyghur diyaridin ghayet zor miqdarda tok yötkesh arqiliq hel qilin'ghan. Emma bu tokning qandaq hasil qilin'ghanliqi heqqide uchur bérilmigen.

Halbuki buningdin birnechche kün ilgiri xitay döletlik énérgiye shirkiti Uyghur diyaridiki kömür qézish xizmitide 50 milyon tonniliq yéngi rékortning yaritilghanliqini élan qilghan bolup, bu hal nöwettiki xitay ölkilirini tok bilen teminleshte ishlitiliwatqan tokning kömürni köydürüsh arqiliq hasil qiliniwatqan bolushi mumkinlikini algha sürmekte iken. Uyghur diyarida ötken on nechche yilda dawam qilip kelgen “Kömürni köydürüp gazgha aylandurush, andin ichkirige yötkesh” qurulushi Uyghur diyarining muhitini ghayet zor derijide xarab qilghan ishlarning biri idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.