Altayda qazaq charwichi tépiwalghan 8 kilogramliq altun yoqap ketken

Xitay hökümet taratquliri 31-mart xewer bérip, bu yil 1-ayning 30-küni altayning chinggil nahiyisidiki qazaq charwichi tépiwalghan 7.85 Kilogramliq altunning yoqap ketkenlikini bildürdi.

Xitaydiki péngbey torining xewiride déyilishiche, 31-mart küni altay wilayiti chinggil nahiyisining teshwiqat kadiri “Chaghandin ilgiri bu altunning yenila uni tépiwalghan qazaq charwichining qolida saqliniwatqanliqini, altunni tépiwalghan charwichi uni hökümetke tapshurup bermigini üchün, nahiyilik hökümet mexsus adem ewetip bu charwichining a'ilisini qoghdighanliqini, emma hazir altunning nediliki éniq bolmighachqa, nahiyilik hökümetning charwichining a'ilisini qoghdashni bikar qilghanliqi” ni bildürgen.

Xitay hökümet taratquliri bu yil 30-yanwardiki xewerliride “Altay wilayitining chinggil nahiyiside uzunluqi 23 santimétir, kengliki 18 santimétir, éghirliqi 7.85 Kilogram éghirliqtiki sapliqi intayin yuqiri bolghan altun tépilghanliqi” heqqide xewer bergen. Shundin buyan bu xewer we altunning kimge tewe bolush mesilisi munazire témisigha aylan'ghan.

Ijtima'iy taratqulardiki yéqinqi xewerlerde yene, altun we uni tépiwalghan qazaq charwichining sirliq halda ghayib bolghanliqi heqqidimu xewerler tarqalghan idi.