Тесла ширкити буффалодики завутиға хитайниң күнтахталирини орнатқан

Вашингтондин мухбиримиз ирадә тәйярлиди
2024.04.11

Тесла ширкити хитайдин киргүзүлгән вә уйғур мәҗбурий әмгикигә четишлиқ, дәп баһаланған бир хитай ширкитиниң күнтахталирини ишләткән.

Америкадики “тәкшүрүш почтиси” (Investigative Post) намлиқ гезитниң ениқлишичә, тесла ширкити өзиниң җәнубий буффалоға күнтахта ясаш үчүн қурған завутиниң өгзисигә хитай ишләпчиқарған күнтахталарни орнатқан.

Бу күнтахталарни хитайниң LONGi йешил енергийә техникиси ширкити ишләпчиқарған болуп, бу ширкәтниң мәһсулатлирида уйғур елида мәҗбурий әмгәк асасида ишләпчиқирилған материялларниң барлиқи өткән йили әнглийәдики шефилд халлам университети вә хелена кенниди хәлқара әдлийә мәркизиниң доклатлирида тилға елинған иди.

Дуняда иккинчи чоң базар болған америка бүгүнки күндә “йешил енергийә” һесаблинидиған күнтахта вә литий батарейәсигә әң көп еһтияҗлиқ болсиму, әмма “уйғур мәҗбурий әмгикиниң алдини елиш қануни” бойичә хитайниң күнтахталирини чәклигән иди.

Бирақ хәвәрдә дейилишичә, хитайниң  LONGi ширкитиниң баянатчиси вә тесланиң баянатчиси яки баш иҗраийә әмәлдари елон маск һечқайсиси юқириқи гезитниң күнтахталарниң мәҗбурий әмгәк билән болған четишлиқи һәққидики соалларға җаваб бәрмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.