Сәй йиңвен хитайниң бесимиға қаримай йәнә бир нөвәтлик тәйвән президентлиқиға сайланди

Мухбиримиз әркин
2020-01-13
Share
teywen-taiwan-saylam-Sey-yingwen.jpg Тәйвән президенти сәй йиңвен сайламда қайта президентлиққа сайланғанлиқини қоллиғучилири билән тәбриклимәктә. 2020-Йили 11-январ, тәйбей.
AP

Тәйвән президенти сәй йиңвен 11‏-январ күни өткүзүлгән сайламда қайта президентлиққа сайланди.

У шу күни сөзлигән нутқида бейҗиң һөкүмитиниң "бир дөләттә икки хил түзүм" сияситини қобул қилмайдиғанлиқи, хитайниң бесимиға тиз пүкмәйдиғанлиқини билдүрүп, мундақ дегән: "мән бүгүн бейҗиң даирилириға йәнә бир қетим шуни әскәртмәкчимәнки, тинчлиқ, баравәрлик, демократийә вә диялог муқимлиқниң ачқучи. . . Мән бейҗиң даирилириниң шуни билишини үмид қилимән. Демократик тәйвән вә бизниң демократик сайлам арқилиқ вуҗудқа кәлгән һөкүмитимиз тәһдиткә һәргиз тиз пүкмәйду."

11‏-январ өткүзүлгән сайламда сәй йиңвен 57.2 Пирсәнт авазға еришип, сайламдики рәқиби, хитай милләтчи партийәси (гоминдаң) ниң президент намзати хән койүни мәғлуп қилған. Хән койү сайламда аран 38.6 Пирсәнт беләткә еришкән иди.

Бу қетимқи сайлам хитай һөкүмитиниң 2017‏-йили башланған чоң тутқунида 3 милйондәк уйғур вә башқа мусулманларни лагерларға қамиши зор хәлқара мәсилигә айланған, хоңкоңда кәң көләмлик намайиш партлиған шундақла йәнә америка-хитай сода уруши партлап, икки дөләт мунасивити кәскинлишип кәткән мәзгилдә өткүзүлгән. Шуниң билән биргә бу сайламни тунҗи қетим ақсарай билән америка ташқи ишлар министирлиқи тәбриклигән.

Америка ташқи ишлар министири майк помпейо өткән 11-январ күни елан қилған тәбрик сөзидә "америка президенти сәй йиңвенниң америка билән болған күчлүк ортақлиқни алға сүрүштә орнатқан рәһбәрлик ролиға рәһмәт ейтиду. Шундақла дуч кәлгән бесимға қаримай униң тәйвән боғузида муқимлиқни сақлаш вәдисидә чиң турғанлиқини алқишлайду," дегән.

Бәзи анализчиларниң илгири сүрүшичә, хитай һөкүмитиниң һәрбий тәһдитигә қаримай сәй йиңвенниң юқири аваз билән қайта президентлиққа сайлинишида бейҗиңниң кишилик һоқуқ хатириси, болупму униң уйғурларни лагерларға қамиши, хоңкоңлуқ намайишчиларни бастуруши тәйвәнлик нурғун сайлиғучиларға тәсир қилған икән. Лекин бейҗиң һөкүмити тәйвәндики сайлам униң "бир хитай сиясити" гә һечқандақ тәсир қилмайдиғанлиқини билдүргән.

Ройтерс агентлиқиниң хәвәр қилишичә, хитай ташқи ишлар министирлиқи баянат елан қилип, "тәйвәнниң ички қисмида қандақ өзгириш болса болсун, дуняда пәқәт бир хитайниң барлиқи, тәйвәнниң хитайниң бир парчиси икәнликидәк реяллиқ өзгәрмәйду," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт