Amérika xitayni teywen hawa boshluqigha mudaxile qilishni toxtitish toghrisida agahlandurghan

Xitay urush ayropilanliri yéqinqi 4 kün ichide teywenning hawa mudapiye kimlik rayonigha üsüp kirishte rikort yaratqan hemde amérikaning agahlandurushigha uchrighan. Melum bolushiche, xitayning bu 4 kün ichidiki hawa mudaxile herkiti uning hazirgha qeder teywen hawa boshluqida élip barghan tajawuzchiliq herkitining eng yoqiri ipadisige wekillik qilidiken. Shu munasiwet bilen amérika tashqiy ishlar ministirliqi 3-‍öktebir yekshenbe küni xitayni agahlandurghan.

Amérikaning bu heqtiki bayanatida mundaq déyilgen: “Amérika xitay xelq jumhuriyitining teywen etrapidiki iwagerchilik heriketliridin qattiq endishe qilmaqta. Bu heriketler muqimsizliq, xata mölcherleshni keltürüp chiqiridu we rayonning tinchliqi we bixeterlikige buzghunchiliq qilidu.” bayanatta yene “Biz béyjingni teywen'ge qarita herbiy, diplomatik we iqtisadiy bésim ishlitishni we zorlashni toxtitishqa chaqirimiz,” dep körsitilgen.

Melum bolushiche, 1-öktebir, yeni xitay dölet bayrimi küni xitayning 38 dane urush ayrupilani teywenning gherbiy-jenubiy hawa boshliqigha yéqinliship qaytip ketken. 2-‍Öktebir küni xitay urush ayrupilanliri ‍oxshash yolda 39 qétim, 3-öktebir küni 16 qétim uchqan.

Teywen dölet mudapiye ministirliqining éytishiche, amérika 3-öktebir xitayni agahlandurghandin kéyimu, 4-öktebir küni xitayning 58 dane urush arupilani teywen hawa kimlik rayonigha üsüp kirgen. Teywen buninggha qarita bashqurulidighan bomba we urush ayrupilanlirini heriketlendürüp, xitay urush ayropilanlirini agahlandurghan.