“Tiyen'enmén qirghinchiliqi” da mes'uliyiti bolghan xitayning sabiq bash ministiri li péng ölgen

Muxbirimiz sada
2019.07.23
Share on WhatsApp
Share on WhatsApp

Xitayning sabiq bash ministiri, xitay memliketlik xelq qurultiyining sabiq bashliqi, 1989-yili béyjingda yüz bergen “Tiyen'enmén qirghinchiliqi” da biwasite qoli bolghan li péng bu yil 22-iyul küni 91 yéshida ölgen.

“Washin'gton pochtisi” gézitining 23-iyuldiki xewirige qarighanda, “Shinxu'a tori” li péngning melum késelge giriptar bolghanliqini élan qilghan bolsimu, uning wapat bolush sewebi heqqide éniq melumat bermigen.

Xewerdin melum bolushiche, li péng 1989-yilidiki “Tiyen'enmén qirghinchiliqi” ni qanliq basturushni küchlük yosunda teshebbus qilghan xitay emeldarlirining biri iken. U shu yilliri bash ministirliq wezipisini ötewatqan mezgilde xitay kompartiyesining bir türküm qatti qqol, konsérwatip rehberliri bilen birlikte oqughuchilarning naraziliq herikitini “Dölet bixeterlikige nisbeten bir tehdit” dep qarighan. 1989-Yili may éyining axirida li péng herbiy halet buyruqi élan qilip, xitay qoralliq qisimning béyjinggha kirishige yol qoyghan. Shu yili 6-ayning 4-küni xitay qoralliq qisimliri tinch usulda namayish qiliwatqan minglighan oqughuchilarni qanliq basturghan. Shu wejidin li péng “Béyjingdiki kalla késer” dep nam alghan.

Igilinishiche, tiyen'enmén meydanida oqughuchilar namayishi yuqiri pellige chiqqan mezgilde shu qétimliq oqughuchilar herikitining rehberliridin biri bolghan örkesh dölet xitay bash ministiri li péng bilen xelq sariyida munazirileshken hemde li péngning yasalma sözlirige neq meydanda qattiq reddiye bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet