Sabiq tyenjin muweqqet sheher bashliqi jazalandi

Xitayning merkezge biwasite qarashliq sheherliridin biri tyenjin shehirining sabiq muweqqet partiye sékrétari we muweqqet sheher bashliqi xu'ang shin'go jazalan'ghan.

B b s agéntliqining xitay aliy teptish mehkimisining élani asasida bergen xewiride körsitilishiche, xu'ang shin'go xitay aliy teptish mehkimisi teripidin parixorluq jinayiti bilen délo turghuzulup, qattiq chare körülgen.

Aliy teptish mehkimisi uning “Éghir derijide siyasiy intizam we siyasiy qa'idige xilapliq qilghanliqi”ni körsetken,

Melum bolushiche, xu'ang shin'go 2014-yili, 12-ayda tyenjin sheher partkomning muweqqet partiye sékrétarliq we muweqqet sheher bashliqliq wezipisini zimmisige élip, 8 aydin kéyin, tyenjinde partlash yüz bérip, 165 adem ölgen we köp sanda adem yarilan'ghan idi. Xu'ang shin'go ötken yili 9-ayda tekshürüshke élin'ghan we bu yil, 4-yanwar küni, xizmiti we partiyidin heydelgen.

Aliy teptish mehkimisining eyiblesh élanida uning yene turmushta chirikleshkenliki, para alghanliqi, sowgha qobul qilghanliqi qatarliq partiye intizamigha xilap qilmishliri körsitilgen.

Xu'ang shin'go xitay kompartiyisi merkizi komitétining ezasi idi.

Xewerde déyilishiche,emma xu'ang shin'goning tyenjindiki chong partlash weqeside mes'uliyiti bar yoqluqi tilgha élinmighan. Wehalenki, tyenjin sheherlik yuqiri sot mehkimisi ötken yili 11-ayda 49 ademni tyenjin déngiz sahilidiki partlash weqeside mes'uliyiti barliqi sewebidin sotlighan idi.