Тибәт тәшкилати пройектор арқилиқ хитайниң бастуруш сияситигә диққәт тартти

Мухбиримиз җүмә
2020-07-12

10-Июл тибәт тәшкилати лондондики хитай әлчиханиси вә алма компютерлирини сетиш дукини қатарлиқларниң тамлириға "уйғурларға әркинлик" дегәндә охшаш шоарларни пройектор арқилиқ чүшүрүп, җамаәтниң диққитини хитайниң бастуруш сиясәтлиригә тартти.

Паалийәтни баш штаби америкиниң сан франсиско шәһиригә җайлашқан "хәлқара тибәт тори" тәшкилати уюштурған. Шоарлар шу җай вақти 10-июл йерим кечидә пройектор арқилиқ хитай әлчиханисиниң темини йорутқан.

Шоарлар: "хитайда әркинлик йоқ, тибәткә әркинлик, уйғурларға әркинлик, хоңкоңға әркинлик" дегән сөзләрдин тәркиб тапқан.

Мәзкур тәшкилатиниң бу һәқтики баянатиға қариғанда, бу һәрикәттин мәқсәт хитайниң "тибәт вә шәрқий түркистанда йиллардин буян давам қилип келиватқан дәпсәндичиликлири вә хоңкоңда кеңийиватқан бастурушлири" дики адәмни шүркүндүридиған охшашлиқларға диққәт тартиш икән.

Бу хилдики шоарлар вә бир қисим қисқа филимлар йәнә охшаш күндә лондондики алма компютерлирини сетиш дуканлири вә "иқтисадшунас" намлиқ гезитиниң тәһрир бөлүми җайлашқан бинаниң темиғиму чүшүрүлгән.

Тәшкилат шундақ қилиш арқилиқ алма ширкитини хитайдики алма ширкити юмтал дукинидики тор атлаш әплирини еливетиш қарарини өзгәртишкә чақирған. Уларниң билдүрүшичә, алма ширкити йеқинда хитайдики юмтал дукинидин мәвһум хусусий тор (VPN) қатарлиқ бири қисим юмталларни еливетишни қарар қилған. Бу еливетилгән юмталлар хитайдики тибәтләрниң сиртқи дуня билән бихәтәр вә тосалғусиз алақә қилинишини капаләткә игә қилип кәлгән икән.

Мәлум болушичә, әнглийәдики "иқтисадшунас" гезити 2020-йилиниң бешида хитай компартийәсиниң корона вирусиға қайтурған инкаслирини махтайдиған бир қисим баш мақалиләрни елан қилған. Тибәт паалийәтчиләр мәзкур гезитниң уларниң хитай компартийәси башқурушидики "бейҗиң тәқризи" журнили билән һәмкарлашқан яки һәмкарлашмиғанлиқини сориған.

Тәшкилатниң көрситишичә, "бейҗиң тәқризи" журнили илгири "шәрқий түркистанда кәң көләмлик йолға қоюлған қайта тәрбийәләш лагерлирини ‹уйғурларға үмид беғишлаш үчүн' қурулған ‹тәрбийәләш мәркәзлири' дәп атиған" икән.