Ammiwi guruhlar tibet ana til teshebbuschisi tashi wangchuni qutquzush herikiti bashlidi

Muxbirimiz erkin
2017-01-27
Share

Chet'eldiki ammiwi guruhlar jüme küni türmidiki tibet ana til teshebbuschisi tashi wangchuni qutquzush üchün imza toplash herikiti bashlighan. Sürgündiki tibet taratqulirining xewer qilishiche, imza toplash herikiti jüme küni hindistanning daramsala rayonida bashlan'ghan. Heriketni xelq'ara kechürüm teshkilati, erkin tibet herikiti, tibet kishilik hoquq-démokratiye merkizi qatarliq teshkilat we ammiwi guruhlar bashlighan.

Bu yil 31 yashliq tashi wangchu chingxey ölkisi yishu nahiyesining puqrasi bolup, u bultur 1‏-ayda qolgha élin'ghan we bölgünchilik bilen eyiblen'gen. Ilgiri amérika "Nyuyork waqti géziti" uning tibetler heqqidiki qisqa filimi-"Tibetlerning durustluq yoli" ni ishleshke yardem qilghan.

Sürgündiki tibet kishilik hoquq teshkilatlirining bildürüshiche, mezkur qisqa filim nahayiti ghulghula qozghighan bolup, tashi wangchu shu seweblik qolgha élin'ghan. Emma u burun izchil xitay hökümitini tibetlerning ana tilini qoghdashqa chaqirip kelgen.

Tibet kishilik hoquq teshkilatlirining qeyt qilishiche, eger sot uning "Jinayiti" ni muqimlashtursa, uning 15 yilliq qamaq jazasigha höküm qilinish éhtimali bar iken. Daramsalada imza toplash pa'aliyiti bashlan'ghan küni yene, tibetler kanadaning toronto shehiri, amérikining nyuyork sheherliride turushluq xitay diplomatik organlirining aldida naraziliq herikiti élip barghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet