Ярлу заңбу дәряси сүйини тәклимаканға башлаш пиланиниң хам хиял икәнлики илгири сүрүлди

Мухбиримиз җүмә
2017-11-11
Share

Хитайниң тибәттин тонил арилиқ уйғур елигә су йөткәшни ойлишиватқанлиқи хәвәр қилинғандин кейин оттуриға чиққан мулаһизиләрдә буниң бир хам хиял икәнлики илгири сүрүлмәктә.

Хоңкоңдин чиқидиған “җәнубий хитай сәһәр гезити” дә бу һәптә елан қилинған бир хәвәрдә хитай инженерлириниң ярлу заңбу дәряси сүйини тәклимакан қумлуқиға башлайдиған 1 миң километирлиқ тонил ясашни пилан қиливатқанлиқи көрситилгән иди. 

Хәвәрдә мәзкур тонилниң тибәт егизликидин башлинидиғанлиқи, бир нәччә йәрдә шарқиратмилар арқилиқ туташтурулуп, ахири тәклимакандики су мәнбәлиригә улинидиғанлиқи илгири сүрүлгән. 

Хәвәргә қариғанда, хитай инженерлири бу йил авғусттин буян йүннән өлкисидә 600 километирлиқ бир су йәткүзүш тонили ясашқа башлиған. Бу тонилға икки юқири сүрәтлик пойиз сиғидиған болуп, тониллар деңиз йүзидин нәччә миң метир егизликтики тағ чоққилиридин өтидикән. 

Хәвәрдә тәтқиқатчиларниң ейтқанлиридин нәқил елип көрситишичә, йүннәндә ясиливатқан бу су тонилини кәлгүсидә ясилиш пилан қилинған тибәт-тәклимакан су тонилиниң синақ нусхиси дейишкиму болидикән. 

Һалбуки, австралийәдики кәлгүси йөлинишләр намлиқ хәлқаралиқ тәтқиқат институти бу қурулуш пиланиниң әмәлгә ашмайдиғанлиқини көрсәткән. 

Улар, җүмә күни елан қилған бу һәқтики мулаһизә мақалисидә, хитайниң қошна әлләр билән болған мунасивәтлири, технологийә вә геологийилик реаллиқлар түпәйли мәзкур қурулушниң рояпқа чиқмайдиғанлиқини көрсәткән. 

Мулаһизигә қариғанда, тибәттин башлинидиған су мәнбәсиниң һиндистан қатарлиқ қошна әлләргә тутишидиғанлиқи сәвәблик, ярлу заңбу дәряси сүйини башқа яққа башлап кетиш, әзәлдин су қис болған һиндистанда кәскин инкас қозғайдикән. 

Мулаһизидә нәқил қилишичә, бу һәқтә тохталған сүргүндики тибәт һөкүмитиниң баш министири лобсаң саңгай хитайниң бу қурулушини “су бомбиси” дәп атиған вә бу қурулушниң тоқунуш кәлтүрүп чиқиришидин әндишә қилидиғанлиқини билдүргән. 

Униңдин башқа хитайда нөвәттә бундақ мурәккәп су башлаш қурулушини вуҗудқа чиқарғудәк техника һазирланмиғанниң үстигә, тибәт егизликидики геологийилик реаллиқ хитайниң мәзкур пиланиға зор риқабәтләрни елип келидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт