Әнглийә һөкүмитиму тик токни чәклимәкчи

Йеқинқи бир нәччә һәптидә, америка, канада, явропа иттипақи, вә белгийә хитайниң җасуслуқ әп детали дәп қариливатқан тик токни һөкүмәт орунлирида ишлитиштин чәкләватқан болуп, буниңға әнглийәму қетилған.

Әнглийә “муһапизәтчи” ториниң 16-март күни хәвәр қилишичә, парламент әзалири вә уларниң мәсләкдашлиридин тәшкил тапқан бир гуруппа әмәлдарлар әнглийә учур комиссариға тәләп сунуп, хитайниң башқурушидики тик токниң әнглийә пуқралириниң хусусий мәхпийәтликини оғрилаш әһвалини тәкшүрүшкә чақирған.

Әнглийәдики хитайға қарши парламент әзалири бирликидин кәлгән хәттә “тик ток әп детали учурларни қоғдаш қануниға әмәл қилмайду” дейилгән. Парламент әзалириниң қаришичә, тик ток әгәр бу қанунға риайә қилишниң амалини тапалмиса, әнглийәдики тиҗаритини тохтитиши мумкин икән.

Әнглийә ички ишлар министири оливер дорден(Oliver Dowden) ниң билдүрүшичә, әнглийә истихбарат әмәлдарлири тик токниң җасуслуқ қилмишлирини тәкшүрүп ениқлиғандин кейин, бу әп деталини әнглийә министирлири, мәслиһәтчилири вә мәмурлириниң ишлитишини дәрһал чәкләйдикән.

Оливер дорденниң ейтишичә, хитайда вә дуняда йүз милйонлап абонти болған бу әп детали уни ишләткүчиләрдин телефондики санлиқ мәлумат вә учурларни очуқ қоюшни тәләп қилип турувалидикән. Андин хитай тәрәп у учурларға асанла еришидикән.

Хәвәрдә ейтилишичә, хитай тәрәп әнглийәниң тик токни чәклимәкчи болушиға етираз билдүрүп: “бу, әнглийәниң сиясий қарари, хәлқара җәмийәтниң әнглийәдә сода қилиш ишәнчи шуниң билән бузулиду” дегән.