En'gliye hökümitimu tik tokni cheklimekchi

Yéqinqi bir nechche heptide, amérika, kanada, yawropa ittipaqi, we bélgiye xitayning jasusluq ep détali dep qariliwatqan tik tokni hökümet orunlirida ishlitishtin cheklewatqan bolup, buninggha en'gliyemu qétilghan.

En'gliye “Muhapizetchi” torining 16-mart küni xewer qilishiche, parlamént ezaliri we ularning meslekdashliridin teshkil tapqan bir guruppa emeldarlar en'gliye uchur komissarigha telep sunup, xitayning bashqurushidiki tik tokning en'gliye puqralirining xususiy mexpiyetlikini oghrilash ehwalini tekshürüshke chaqirghan.

En'gliyediki xitaygha qarshi parlamént ezaliri birlikidin kelgen xette “Tik tok ep détali uchurlarni qoghdash qanunigha emel qilmaydu” déyilgen. Parlamént ezalirining qarishiche, tik tok eger bu qanun'gha ri'aye qilishning amalini tapalmisa, en'gliyediki tijaritini toxtitishi mumkin iken.

En'gliye ichki ishlar ministiri oliwér dordén(Oliver Dowden) ning bildürüshiche, en'gliye istixbarat emeldarliri tik tokning jasusluq qilmishlirini tekshürüp éniqlighandin kéyin, bu ep détalini en'gliye ministirliri, meslihetchiliri we memurlirining ishlitishini derhal chekleydiken.

Oliwér dordénning éytishiche, xitayda we dunyada yüz milyonlap abonti bolghan bu ep détali uni ishletküchilerdin téléfondiki sanliq melumat we uchurlarni ochuq qoyushni telep qilip turuwalidiken. Andin xitay terep u uchurlargha asanla érishidiken.

Xewerde éytilishiche, xitay terep en'gliyening tik tokni cheklimekchi bolushigha étiraz bildürüp: “Bu, en'gliyening siyasiy qarari, xelq'ara jem'iyetning en'gliyede soda qilish ishenchi shuning bilen buzulidu” dégen.