FBI Diréktori: “Xitay hökümiti ‛tik-tok‚ ornitilghan üskünilerni kontrol qilalaydu!”

Yéqinda amérika kéngesh palatasi qarmiqidiki istixbarat komitéti chaqirghan guwahliq bérish yighinida amérika fédératsiye tekshürüsh idarisi (FBI) ning diréktori kris ray (Chris Wray) mexsus guwahliq bérip, xitay hökümitining “Tik-tok” arqiliq mezkur ep ornitilghan üskünilerni kontrol qilalaydighanliqini bildürgen.

Amérika hökümiti birnechche yildin buyan “Tik-tok” ning xususiy uchurlarni toplash hemde xitay hökümitige yetküzüp bérish qilmishi tüpeylidin amérika tewesidin “Tik-tok” ni üzél-késil cheklesh teshebbusini otturigha qoyup kéliwatqanliqi melum. Bu qétimqi guwahliq bérish yighinida, bu mesile yene bir qétim merkiziy téma bolghan. Shu qatarda mezkur komitétning re'isi, kéngesh palata ezasi marko rubyo (Marco Rubio), “Nawada xitay hökümiti hemkarlishishqa mejbur qilsa, ‛tik-tok‚ shirkiti mezkur ep ornitilghan milyonlighan üskünilerni kontrol qilalamdu?” dep sorighanda, ray ependi keskinlik bilen “Shundaq!” dep jawab bergen.

Ray ependi öz sözide xitay hökümitining özi kontrol qilalighan milyonlighan üsküniler arqiliq yene amérika tewesidiki “Tik-tok” ishletküchilerni bir-birige qarshi qilip sélip qoyalaydighanliqinimu alahide tekitligen. Uning bayan qilishiche, xitayda herqandaq shirket jezmen hökümet bilen shertsiz hemkarlishishqa mejbur bolghachqa, ularning bashqa tallishi bolmaydiken. Téximu muhimi, “Tik-tok” peqet amérika tewesidiki qollan'ghuchilar üchün layihelen'gen bolghachqa, xitay tewesidiki qollan'ghuchilar uning xitayche neshri bolghan “Doyin” ni ishlitidiken. Qollan'ghuchilarning rayon perqidiki cheklime tüpeylidin amérika tewesidikiler “Doyin” ni yaki xitay tewesidikiler “Tik-tok” ni chüshürelmeydiken.

Melum bolushiche, amérika teweside “Tik-tok” ni qollan'ghuchilar yüz milyondin ashidighan bolup, del mushu xil endishilik sewebler tüpeylidin amérika hökümiti hökümet tarqitip bergen üskünilerge “Tik-tok” ni ornitishni men'iy qilish heqqide qarar alghan. Dunyaning bashqa jayliridimu bu xildiki men'iy qilishlar yéqindin buyan köplep otturigha chiqishqa bashlighan.