Президент җов байден тиктокни чәкләйдиған қанун лайиһәсигә имза қойди
2024.04.24
Дөләт мәҗлиси әзалири американиң хәвпсизликигә тәһдит селиватқан тиктокни чәкләшни мақуллайдиған қанун лайиһәсини мақуллашни тезләткәниди.
“вашингтон почтиси” гезитиниң 24-апрел хәвәр қилишичә, бу күни америка президенти җов байден тиктокни чәкләйдиған яки уни сатқузидиған қанун лайиһәсигә имза қойғанлиқини елан қилған. Униңдин бир нәччә саәт илгири, америка дөләт мәҗлиси хитайниң йиллардин буян тикток суписидин пайдилинип, американиң хәвпсизлики вә җәмийәт аманлиқиға зиян селиш урунушлириниң мәғлуп болғанлиқини җакарлиған.
Президент җов байден 24-апрел күни тиктокни чәкләш яки сатқузуш қанун лайиһәсигә имза қойғандин кейин у қанунға айланған болуп, мәзкур қанунға асасән тикток кәлгүси 9 ай ичидә сетилидикән, әгәр сетилмиса америка миқясида пүтүнләй чәклинидикән.
Тиктокни чәкләш қанун лайиһәси америка дөләт мәҗлисидики һәр икки партийәниң қоллишиға еришкән болуп, авам палатаси вә кеңәш палатасидин оңушлуқ өткәниди.
Америкадики абонтлири 170 милйондин ешип кәткән тикток америкада өз алдиға иқтисад вә мәдәнийәт чәмбири қурған болуп, америка роһиға вә американиң қиммәт қаришиға хирис елип кәлгән, яш-өсмүрләрниң роһий сағламлиқини бузушта алаһидә рол ойнап кәлгәниди. Тикток йәнә америка абонтлириниң шәхсий учурлирини хитай һөкүмитигә тәминләп бәргәнлики билән әйиблинип кәлгәниди.
Хәвәрдә ейтилишичә, тикток ширкити 24-апрел күни баянат берип, бу қанун үстидин сотқа әрз қилип, мушәққәтлик дәва-дәстур ишлирини башлайдиғанлиқини, “америкадики милйонлиған кишиләрниң пикир әркинликини қоғдаш” үчүн күрәш қилидиғанлиқини билдүргән.