Prézidént jow baydén tiktokni chekleydighan qanun layihesige imza qoydi

Washin'gtondin muxbirimiz jewlan teyyarlidi
2024.04.24

Dölet mejlisi ezaliri amérikaning xewpsizlikige tehdit séliwatqan tiktokni chekleshni maqullaydighan qanun layihesini maqullashni tézletkenidi.

“Washin'gton pochtisi” gézitining 24-aprél xewer qilishiche, bu küni amérika prézidénti jow baydén tiktokni chekleydighan yaki uni satquzidighan qanun layihesige imza qoyghanliqini élan qilghan. Uningdin bir nechche sa'et ilgiri, amérika dölet mejlisi xitayning yillardin buyan tiktok supisidin paydilinip, amérikaning xewpsizliki we jem'iyet amanliqigha ziyan sélish urunushlirining meghlup bolghanliqini jakarlighan.

Prézidént jow baydén 24-aprél küni tiktokni cheklesh yaki satquzush qanun layihesige imza qoyghandin kéyin u qanun'gha aylan'ghan bolup, mezkur qanun'gha asasen tiktok kelgüsi 9 ay ichide sétilidiken, eger sétilmisa amérika miqyasida pütünley cheklinidiken.

Tiktokni cheklesh qanun layihesi amérika dölet mejlisidiki her ikki partiyening qollishigha érishken bolup, awam palatasi we kéngesh palatasidin ongushluq ötkenidi.

Amérikadiki abontliri 170 milyondin éship ketken tiktok amérikada öz aldigha iqtisad we medeniyet chembiri qurghan bolup, amérika rohigha we amérikaning qimmet qarishigha xiris élip kelgen, yash-ösmürlerning rohiy saghlamliqini buzushta alahide rol oynap kelgenidi. Tiktok yene amérika abontlirining shexsiy uchurlirini xitay hökümitige teminlep bergenliki bilen eyiblinip kelgenidi.

Xewerde éytilishiche, tiktok shirkiti 24-aprél küni bayanat bérip, bu qanun üstidin sotqa erz qilip, musheqqetlik dewa-destur ishlirini bashlaydighanliqini, “Amérikadiki milyonlighan kishilerning pikir erkinlikini qoghdash” üchün küresh qilidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.