Tik-tokning Uyghur irqiy qirghinchiliqini tenqid qilghan meshghulat diréktori wezipisin istipa bergen

Xitayning xelq'arada dangliq widéyo alaqe supisi bolghan tik-tokning Uyghur irqiy qirghinchiliqini tenqid qilghan bash meshghulat dériktori wannéssa pappas wezipisidin istipa bergen. Wannéssa pappasning tuyuqsiz istipa bérishi, uning bu yil 3-ayda Uyghur irqiy qirghinchiliqini eyibleydighanliqini bildürüshi bilen baghlinishliq yaki emesliki téxi éniq emes. Bash ijra'iye dériktori jaw shawzéning élan qilghan bayanatida, wannéssa pappasning “Igilik tiklesh qizghinliqigha qayta merkezlishish üchün istipa bergenliki” tekitlen'gen. Wannéssa pappas bu yil 3-ayda twéttérda qilghan bir sözide, xitayning ‍uyghurlargha yürgüziwatqan irqiy qirghnchiliqini eyibleydighanliqini bildürüp, bu qirghinchiliqni eyibleshtin izchil özini qachürüp kelgen jaw shawzégha sélishturuma bolup qalghan.

Jaw shawzé bu yil 3-ayning 23-küni amérika awam palatasida guwahliq bergende, bir awam palata ezasining uningdin sorighan xitayning Uyghurlargha yürgüziwatqan irqiy qirghinchiliqini eyibleydighan-eyiblimeydighanliqi heqqidiki su'aligha jawap bérishtin özini qachurghan. Emma wannéssa pappas twittérda bu heqtiki so'algha qirghinchiliqni eyibleydighanliqini éytqan. Amérika NBC xewerlirining melum qilishiche, tik-tok wannéssa pappasning ornigha disnéy shirkitining sabiq ‍axbarat bayanatchisi zéniya mucha teyinlen'gen.

Lékin wannéssa pappas tik-tikning xizmetchilirige qaldurghan sözide “Tik-tokta qolgha keltürülgen barliq muweppeqiyetlerni közde tutup, axiri igilik tiklesh qizghinliqimni ilgiri sürüsh we qayta oylinishning muwapiq peyti kelgenlikini hés qildim” dégen. Bu yil 23-mart küni amérika awam palatasida ötküzülgen 5 sa'etlik guwahliq yighinida, jaw shawzé palata ezalirini qayil qilalmighan, palata ezaliri tik-tokni chekleshni telep qilghan. Hetta amérika kéngesh palata ezasi marku rubiyo yéqinda jaw shawzéning shu qétimliq yighinda palata ezalirigha “Yalghan melumat” bergenliki, amérika edliye ministirliqining jawshawzé üstidin délo turghuzup tekshürüshini telep qilghan.