Amérika we awstraliyede tik-tokni cheklesh qiyin bolup qalghan

Amérika we awstraliyede tik-tokning ijtima'iy taratqulargha singip kirish we shexsiy uchurlarni oghrilash qilmishi parlamént we hökümet orunliri teripidin jiddiy qariliwatqan mesile bolsimu, emma uni cheklesh qiyin'gha toxtighan.

“Amérika awazi” torining 7-ayning 11-küni élan qilghan xewirige qarighanda, amérika dölet mejlisi kéngesh patasi we awam palatasi bu yil 3-ayda “Tik-tokni cheklesh qanun layihesi” tüzgendin kéyin, tik-tok buninggha pütün küchi bilen tosqunluq qilghan. Amérika kéngesh palatasi istixbarat komitétining re'isi mark warnér(Mark Warner) ning ashkarilishiche, tik-tok shirkiti 100 milyon dollar xejlep keng kölemde teshwiqat we lobichiliq pa'aliyetliri teshkillep, bu qanunning royapqa chiqishi we maqullinishini keynige sürüwetken.

Melum bolushiche, bash shitabi xitaygha jaylashqan tik-tok shirkitining amérikada 150 milyon abonti bolup, ular 2022-yildimu 5 milyon 400 ming dollar xejlep, cheklinish xewpidin qutulup qalghan.

Awstraliye “ABC Xewerliri tori” ning 7-ayning 11-küni bergen xewiride körsitilishiche, awstraliye parlaménti kéngesh palatasi chet el ijtima'iy alaqe wasitilirining xetirini tizginlesh komitéti re'isi jeymés patérson (James Paterson) tik-tngk heqqide échilghan ispat anglash yighinida “Tik-tokning bash shirkiti ByteDance(doyin) xitaydimu emesmu?” dep so'al qoyghanda, tik-tokning awstraliyediki diréktori élla wods joys (Ella Woods Joyce) tik-tokning bash shitabining nedilikini bilmeydighanliqini éytqan. Jeymés patérson bu jawabtin narazi bolup: “Sizni kontrol qiliwatqan bash shirkitingizning néme ish qilidighanliqini rastinla dep bérelmemsiz? siz u shirketning ehwalini bilmeymen désingiz, so'allirimizgha semimiylik bilen jawab bérelmeysiz, ménimu qaymuqturup qoyisiz” dep qattiq tegken.

Tik-tokta ishleydighan xitay xizmetchiliri awstraliyediki tik-tok abontlirining sanliq melumatigha érishelemdu-yoq dégen mesile soralghanda, tik-tokning amérikadiki sanliq melumat bixeterliki bölümidin wil farrél (Will Farrel) buninggha jawab bérip: “Bu heqte éniq sanliq melumat yoq” dégen.

Nöwette, tik-tokning amérika we awstraliyediki orni we tesiri yenila küchlük iken. Amérika reqemlik uchur téxnikisini tereqqiy qildurush tetqiqat ornining bashliqi joyl tayér (Joel Thayer) ning bildürüshiche, tik-tok hazirmu amérikada dewr sürüwatqan we pul tépiwatqan bazarliq ep détali bolup, tik-tok shirkitining teshwiqat we lobichiliq herikiti belgilik netije qazan'ghan.