ئامېرىكانىڭ جۇمھۇرىيەتچى ئاۋام پالاتا ئەزالىرىدىن مايك گاللاگېر ئامېرىكالىقلارنى خىتاي ۋىدىيو تاراتقۇ سۇپىسى تىكتوكنى ئۆزلىرىنىڭ ئىجتىمائىي ئالاقە ۋاسىتىلىرىدىن ئۆچۈرۈپ تاشلاشقا چاقىرغان. مايك گاللاگېرنىڭ ئېيتىشىچە، تىكتوكنىڭ ئابۇنتلىرىنىڭ تىكتوكتىن باشقا ئىجتىمائىي ئەپلەردىكى شەخسى سانلىق مەلۇماتلىرىنىمۇ ئىز قوغلىشى مۈمكىنچىلىكىدىن ئەندىشە قىلىدىكەن. «پولىتىكا» گېزىتىنىڭ خەۋەر قىلىشىچە، گاللاگېر 18-دېكابىر ئامېرىكا سىملىق تېلېۋىزىيە تورى CNN نىڭ زىيارىتىنى قوبۇل قىلغاندا، ئامېرىكالىقلار خىتاي ھۆكۈمىتىنىڭ تىكتوكتىن پايدىلىنىپ ئامېرىكا بالىلىرىغا زىيانكەشلىك قىلىشىنى «بىز بىلمىگەن تەقدىردىمۇ»، تىكتوكنى ئۆچۈرۈپ تاشلىشى كېرەكلىكىنى ئېيتقان.
ئۇنىڭ ئېيتىشىچە، ئۇنىڭ پىكىرى ئامېرىكا ياشلىرىغا بەك ياقمىسىمۇ، «بىراق بۇ يەردىكى تۈپ مەسىلە تىكتوكنىڭ ئىگىسى بولغان بايتى دەنس يەنى «زىجيە تياۋدوڭ» شىركىتىنىڭ «ئۈنۈملۈك رەۋىشتە خىتاي كومپارتىيەسى تەرىپىدىن كونترول قىلىنىشى» ئىكەن. گاللاگېر، تىكتوكنىڭ يۇمشاق دېتال ئالگوروزىمى ناھايىتى يۇقىرى دەرىجىدە شەخسىيلەشكەنلىكىنى، شۇنىڭ بىلەن بىر ۋاقىتتا ئۇنىڭ ئابۇنتلىرىنىڭ تىكتوكتىن باشقا ئەپلەردىكى شەخسى سانلىق مەلۇماتلىرىنىمۇ ئىز قوغلاش مۈمكىنچىلىكىدىن ئەندىشە قىلىدىغانلىقىنى ئېيتقان. گاللاگېر تىكتوكنى ئەجەللىك زەھەرلىك چېكىملىك بولغان فانتانىل بىلەن سېلىشتۇرۇپ، تىكتوكنىڭ كىشىلەر كۆرىدىغان خەۋەرلەرنى تاللاپ بېرىش مۈمكىنچىلىكىمۇ بارلىقى، ئۇنىڭ «ئىنتايىن خۇمار قىلارلىق، يۇقىرى دەرىجىدە بۇزغۇنچىلىققا ئىگە» ئىكەنلىكىنى بىلدۈرگەن.
«پولىتىكا» گېزىتىنىڭ ئېيتىشىچە، نۆۋەتتە تىكتوكقا قارىتا دېموكراتلاردىمۇ ئەندىشە كۈچىيىۋاتقان بولۇپ، ئۆتكەن ھەپتە دېموكراتلاردىن بولغان ئاۋام پالاتا ئەزاسى راجا كرىشنامورسى تىكتوكنى چەكلەش ھەققىدە بىر قانۇن تەكلىپ لايىھەسى سۇنغان. خەۋەردە، جۇمھۇرىيەتچى كېڭەش پالاتا ئەزالىرىدىن ماركو رۇبىئو، تام كاتتونلارنىڭمۇ تىكتوكنى چەكلەش تەرەپدارلىرى ئىكەنلىكى بىلدۈرۈلگەن.