Amérika awam palatasi ukra'ina, isra'iliye we teywen'ge yardem bérish bilen tik tokni chekleydighan qanun layihesini maqullighan
2024.04.22
Amérika awam palatasi 20-aprél ukra'ina, isra'iliye we teywen'ge yardem bérish bilen tik-tokni chekleydighan qanun layihesini maqullap amérika kéngesh palatasigha yollighan.
Roytérs agéntliqi (Reuters) ning xewirige asaslan'ghanda, amérika awam palatasi shenbe, yeni2024-yili 4-ayning 20-küni küni ikki partiyening keng qollishi bilen ukra'ina, isra'iliye we teywen'ge 95 milyard dollarliq yardem béridighan qanun layihesini maqullap amérika kéngesh palatasigha yollighan. Bu qanun layihesi pat arida kéngesh palatasi teripidin ötküzülgendin kéyin pirézidént jo baydénning imzasi üchün yollinidiken.
Bu qanun layihesi isra'iliyege yardem qilish, teywen we hindi-tinch okyandiki amérikaning ittipaqdashlirigha bixeterlik yardimi körsitish, xitayning igidarchiliqidiki ijtima'iy alaqe détali tik-tok (TikTok) ni cheklesh we musadire qilin'ghan rusiye mal-mülüklirining ukra'inagha bérilishi qatarliq mezmunlarni öz ichige alidiken.
Bu qanun layihesi tik-tokni sétishqa mejburlash, eger satmighan teqdirde tik-tokni pütünley chekleshni telep qilidiken. Bu layihe qanun bolup qobul qilin'ghandin kéyin, eger tik-tokni sétish bir yil ichide yüz bermise, tik tok amérikada cheklinidiken.
Maykél sobolik (Micheal Sobolik) ke oxshash mutexessislerning qarishiche, xitay tik-tok arqiliq amérika jama'et pikrining ichige “Soqunup kirish” arqiliq amérika démokratiyesige tehdit peyde qilmaqtiken. Ular, tik-tokni dölet bixeterliki jehette “Amérika bügün duch kéliwatqan eng chong tehditlerning biri bolmaqta” dep körsetken.
Aqsaray ötken jüme künidiki bayanatida mundaq dégen: “Dunya amérika dölet mejlisining néme qiliwatqanliqini közitiwatidu. Bu qanun layihesining maqullinishi muhim, bu amérika rehberlik qatlimining küchlüklüki toghrisida dunyagha küchlük uchur béridu. Baydén hökümiti awam palatasi we kéngesh palatasining bu qanun layihesini tézlikte testiqlap pirézidéntqa ewetishni telep qilidu”.
Bu qanun layihesige asaslan'ghanda, ukra'inagha 60 milyard 840 milyon dollar, amérikaning qoral-yaragh, pay chéki we eslihelirini toluqlishi üchün 23 milyard dollar, isra'iliye üchün 26 milyard dollar, insanperwerlik éhtiyaji üchün 9 milyard 100 milyon dollar, hindi-tinch okyan rayoni üchün 8 milyard 120 milyon dollar bérilidiken.