Хитайниң тиктокни елон маскқа сетип бериши мумкинлики тәхмин қилинмақта

Баш иштаби хитайдики тикток ширкитиниң америкада чәклиниш яки америка ширкәтлиригә сетилиш тәқдири йеқинлишиватқан бир мәзгилдә, хитайниң бу ширкәтни қутулдуруш үчүн уни америкалиқ мәшһур карханичи, дунядики әң чоң бай елон маскқа сетип бериши мумкинлики пәрәз қилинмақта.

“бломберг хәвәрлири” тори 13-январ елан қилған бу хәвәрдә дейилишичә, хитай әмәлдарлири тиктокниң тәқдирини бир тәрәп қилиш үстидә җиддий таллашқа дуч кәлгән. Ички әһвални билидиғанларниң ейтишичә, әгәр тикток американиң чәкләш буйруқини әмәлдин қалдуралмиған тәқдирдә, хитай әмәлдарлири униң америкадики мулазимитини даңлиқ карханичи елон маскқа сетип бериши мумкин икән.

Тикток ширкити америка алий сотидин, тиктокни чәкләш буйруқини бикар қилишни тәләп қилған болсиму, баш сотчи 1-айниң 10-күни қилған сөзидә, әслидики буйруқни сақлап қелиши мумкинликини ейтқан.   Буниңдин илгири, америка пирезиденти доналд трампниң тиктокни сақлап қелишқа илтимас қиливатқанлиқи, әмма америка алий сотиниң уни рәт қилиш еһтимали барлиқи һәққидә хәвәрләр чиққаниди.

“бломберг хәвәрлири” ниң мәлумат беришичә, хитай әмәлдарлири нөвәттә тиктокни сетиш мәсилисидә, пирезидент доналд трампниң әң йеқинлиридин биригә көз тикиватқан болуп, у болсиму доналд трампниң сайлимиға 250 милйон ярдәм қилған елон маск икән. Әгәр елон маск тиктокниң америкадики мулазимитини сетивалса, әң чоң иҗтимаий алақә супилиридин X билән тиктокқа тәң игә болуп, уларниң тиҗаритини тәң башқуридикән. Нөвәттә тиктокниң америкадики абонтлири 170 милйондин ашидиған болуп, бундақ зор көләмдики абонт сани X ниң тиҗаритиниму ронақ тапқузидикән. Әмма хитай әмәлдарлириниң елон маск билән қандақ содилишидиғанлиқи, баһани қандақ бекитидиғанлиқи, әң муһими елон маскниң бу содиға қандақ қарайдиғанлиқи ениқ әмәс икән. Елон маск яки униң вәкиллири буниңға техи инкас қайтурмиған. Әмма елон маск X дә язған учурида, “ тиктокниң чәклиниши гәрчә X қа пайдилиқ болсиму,  мениңчә, тикток америкада чәкләнмәслики керәк. Бундақ қилиш пикир әркинликигә хилап” дегән.