Мутәхәссисләр американи тик-ток пәйда қилған “чөчүтәрлик тәһдит” һәққидә агаһландурди

Американиң хитай мәсилилири мутәхәссиси майкел соболик (Micheal Sobolik) 14-апрел американи хитайниң контроллуқидики тик-ток иҗтимаий алақә суписи пәйда қиливатқан “чөчүтәрлик тәһдит” һәққидә агаһландуруп, тик-токни хитайниң америкаға қарши қоллиниватқанлиқини билдүргән. Майкел соболикниң 14-апрел америкадики “фокус рәқәмлик хәвәрләр” қанилиниң зияритини қобул қилғанда тәкитлишичә, “һазир хитайниң америка җамаәт пикрини контрол қилиш иқтидари интайин күчлүк” икән. Майкел соболикниң бу агаһландуруши америка авам палатасиниң йеқинда мутләқ көп авазда тик-токни сетишқа мәҗбурлаш һәққидики қанун лайиһәсини мақуллиған болсиму, лекин бу қанун лайиһәсиниң кеңәш палатасида ениқсиз әһвалда туруватқан бир пәйтидә ейтилған.

Майкел соболикниң қәйт қилишичә, хитайниң тик-ток арқилиқ америка җамаәт пикриниң ичигә “суқунуп кириши” америка демократийәсигә тәһдит пәйдә қилмақтикән. У, тик-токни дөләт бихәтәрлики җәһәттә “биз бүгүн дуч келиватқан әң чоң тәһдитләрниң бири болмақта” дәп көрсәткән.

Майкел соболик мундақ дегән: “тик-ток ноқул технологийә җәһәттики әндишила әмәс, иҗтимаий ахбарат мәсилисиму әмәс. Тик-ток хитайниң бүгүнки америкаға қарши әң чоң ғәйрий симметирик әвзәлликидур. ”

Соболикниң қәйт қилишичә, тик-ток хитай компартийәсиниң америка демократийәсигә қарита пәйда қиливатқан әң җиддий тәһдитигә вәкиллик қилидикән.

Баш иштаби сингапорға җайлашқан тик-ток иҗтимаий алақә суписи, хитайниң бейҗиңни база қилған “зиҗйе тявдоң” йәни “байти дәнс” намлиқ техника ширкитигә қарашлиқ болсиму, мәзкур иҗтимаий алақә суписи өзиниң хитай һөкүмити тәрипидин контрол қилинидиғанлиқини рәт қилип кәлгән. Йеңи нәшр қилинған “хитайниң чоң оюниға қарши күрәш: американиң һөкүмранлиқ истратегийәси” намлиқ китабниң аптори майкел соболикниң көрситишичә, нөвәттә американиң йерими хитай компартийәсиниң контроллуқидики бу әпни ишлитиватқан болуп, хитай компартийәси бу арқилиқ америка җамаәт пикрини контрол қилалайдикән һәм өзиниң тәшвиқатини елип баралайдикән.