“Tik-tok” ning sabiq emeldari xitayning jasusluq qilmishlirini pash qildi

“Nyu-york waqti” gézitining 12-maydiki xewiride éytilishiche, “Bayti dans” (ByteDance) guruhining amérika tewesidiki bash tarmaq shirkitining sabiq ijra'iye emeldari yü yintaw yéqinda san fransisko sheherlik sotta xitay hökümitining “Bayti dans” arqiliq dunya miqyasida jasusluq qilghanliqini pash qilghan. “Bayti dans” guruhi bolsa amérika teweside keng omumlashqan “Tik-tok” ning ana shirkiti hésablinidu.

Xewerde éytilishiche, yü yintaw özi ishlewatqan shirketning xitay kompartiyesining jasusluq qorali bolup qalghanliqini tenqidligen hemde buning qanunsiz qilmish ikenlikini tekitligendin kéyin ishtin boshitilghan. Shuning bilen u san fransisko sheherlik sotqa erz sunup, “Bayti dans” shirkitining eqliy mülük oghriliqi we xususiy uchurlarni oghrilash qilmishlirini pash qilghan. Melum bolushiche, yü yintaw 2017-yilidin 2018-yilighiche “Bayti dans” shirkitining amérika tarmaq shirkitining bash inzhénéri bolup ishligen. Uning sotta bildürüshiche, “Bayti dans” guruhining béyjingda “Komitét” namliq mexsus ishxanisi bolup, uning ezaliri pütünley xitay kompartiyesining ezaliridin teshkil tapqan. Ularning wezipisi “Bayti dans” shirkitining eplirini nazaret qilish, “Kommunistik qimmet qarishining mushu eplerde omumlishishini nazaret qilish” qatarliq mezmunlarni teshkil qilghan. U sotta bu heqte guwahliq bérip “Mezkur ‛komitét‚ ezaliri ‛bayti dans‚ guruhining barliq sandanlirigha, jümlidin amérika tewelikidiki sandanlarning uchurlirigha xalighan waqitta érishish hoquqigha ige” dégen. Shuningdek “Bayti dans” guruhining xitay kompartiyesining buyruqi boyiche xalighan mezmunlarni shaxlitish yaki öchürüwétish bilen meshghul bolghanliqini tilgha alghan.

2023-Yili martta “Tik-tok” ning ijra'iye emeldari ju showzi (Shou Zi Chew) amérika dölet mejliside guwahliq bergende “Héchqandaq hökümet orgini bizning sandanlirimizgha kirelmeydu” dégen. Shuningdek Uyghurlarning qirghinchiliqqa uchrishi heqqidiki so'al qayta-qayta soralghandimu gep yorghilitip jawab bérishtin bash tartqan idi. San fransisko shehiridiki sotta bolsa ularning yalghanchiliqi yene bir qétim pash bolghan.