Amérika tik-tok épi baytdens shirkitidin ayrilmisa uni chekleydighanliqi heqqide agahlandurghan

Amérika baydén hökümiti tik-tok épi eger bash shirkitini almashturmighan teqdirde uni chekleydighanliqini agahlandurghan.

S n n téléwiziyesining éytishiche, bu amérika hökümiti qarmiqidiki “Chet'el meblighi komitéti” (CFIUS) ning tik-tokqa tapshurghan ultimatumi bolup, tik-tok mesilisini hel qilishtiki bir burulush nuqtisi bolup hésablinidiken.

Tik-tok shirkiti yuqiridiki xewerning toghriliqini delilligen emma bérilgen waqit chékining qanchiliklikini ashkarilimighan. TikTok Bayanatchisi ma'urin shanaxan bolsa bu heqtiki bayanatida “Tik-tokni bash shirkitidin ayrishning dölet bixeterliki mesilisini hel qilalmaydighanliqi” ni ilgiri sürgen.

Xitay tashqi ishlar bayanatchisi wang wénbinmu 16-mart künidiki bayanatida “Amérika yalghan gep tarqitip, tik-tokqa orunsiz bésim qiliwatidu” dégen.

Dunya miqyasida 100 milyondin artuq qollan'ghuchisi bolghan tik-tok épining xojayin shirkiti xitayning baytdens (ByteDance) shirkiti bolup, xitay hökümitining baytdens arqiliq milyonlighan tik-tok qollan'ghuchisining shexsi uchurlirigha érisheleydighanliqi küchlük munazire qozghawatqan mesililerning biri. Téxi yéqinda amérika fédératsiye tekshürüsh idarisining bashliqi kristofér wray (Christopher Wray) xitay hökümitining tik-tok kishilerning qol téléfonlirining yumshaq détalini kontrol qilalaydighanliqini éytqan idi. Amérikiliq qanun tüzgüchiler bolsa dölet bixeterlikini közde tutup turup bu epni omumyüzlük halda cheklesh telipini otturigha qoyghan idi. Amérika we en'gliye hökümetliri yéqinda bu epni organ téléfonlirida ishlitishni chekligen.

Melum bolushiche, maliye ministirliqi, edliye, dölet ichi bixeterlik, mudapi'e we soda ministirliqi ezaliridin terkib tapqan “Chet'el meblighi komitéti” ikki yildin köprek waqittin buyan tik-tok bilen söhbet ötküzgen bolsimu bir netije hasil bolmighan iken. Emma yuqiridiki bu ultimatum söhbette özgirish yüz bergenlikini namayan qilidiken.