Amérika kéngesh palata ezasi jeyms rish: “Tiktok amérikaliqlarning salametliki, mexpiyetliki we bixeterliki üchün eng chong tehditlerning biri”

Amérika kéngesh palata ezasi jeyms rish (James Risch) yéqinda amérika fédératsiye soda komitétining re'isi lina xan'gha xet yézip, bu organning amérikaliq yash-ösmürlerni xitay ijtima'iy taratqu supisi tiktoktin qoghdashta qandaq tedbirlerni alghanliqigha chüshenche bérishini telep qilghan. Jeyms rishning xétide tekitlinishiche, xitay tiktokni amérika yash-ösmürlirige qarita “Ménge yuyush mashinisi” ornida qollanmaqtiken. U xétide, tiktokning amérikaliqlarning salametliki, mexpiyetliki we bixeterlikige xewp yetküzüwatqan eng chong tehditlerning biri” ikenlikini bildürgen.

Melum bolushiche, nöwette tiktokning amérikada 150 milyondin artuq abunti bar iken. Tiktokning amérika yash-ösmürlirige élip kéliwatqan xewpige qarita amérika dölet mejlisi ezaliridiki endishe barghanche kücheytmekte. Tiktokning ijra'iye diréktori jaw shawzé bu yil 3-ayda amérika dölet mejlisining awam palatasida guwahliq bergende palata ezalirining shiddetlik so'al-soraqlirigha duch kelgen bolsimu, emma u xitay hökümiti bilen bolghan munasiwiti, shundaqla tiktok abuntlirining sanliq melumatini qoghdashqa da'ir nurghun so'allargha bekmu müjmel jawablarni bergenidi.

Kéngesh palata ezasi jeyms rish fédéraysiye soda komitéti re'isi lina xan'gha yazghan xétide, tiktokning amérikaliq balilargha bolghan tesirini “Kishini endishige salidighan mukemmel boran-chapqun” dep teswirligen. U “Xitayning kontrolluqidiki tiktok amérikaliqlarning salametliki, mexpiyetliki we bixeterlikige xewp yetküzidighan eng chong tehditlerning biri bolmaqta. Bizning perzentlirimiz we newrilirimizning özige ziyan sélish, yémek-ichmek qalaymiqanchiliqi we ziyanliq jinsiy özgertishke teshwiq qilish mezmunidiki widiyolarni körüsh arqiliq xitay kompartiyesining kontrolluqigha chüshüp qélish xewpi téximu asanlashmaqta” dep körsetken. Jeyms rishning xétidin melum bolushiche, u amérika fédératsiye soda komitéti re'isidin uning xétige 30-öktebirdin burun jawab bérishini, ularning balilarni xitay kompartiyesining teshwiqatidin qoghdash üchün qandaq tedbirlerni alghanliqigha chüshenche bérishini telep qilghan.