Уйғурлар дияриниң ток байлиқи хитайни ғайәт зор «сәмриткән»

Мухбиримиз әзиз
2020-07-03
Елхәт
Пикир
Share
Принт

Уйғур дияриниң 1949-йилидин буян хитай һөкүмитиниң әң чоң енергийә базиси болуп кәлгәнлики һәммигә мәлум пакит болсиму, бу җайниң хитай өлкилирини ток билән тәминләштики муһим база болуп кәлгәнлики көп қисим кишиләргә намәлум иди.

Хитай һөкүмити башқурушидики шинхуа агентлиқи 3-июл күни тарқатқан хәвәрдә ейтилишичә, өткән он йил ичидә уйғур дияридин хитай өлкилиригә созулған үч миң километир узунлуқтики төт ғол ток линийәси арқилиқ тошулған ток миқдари 300 милярд киловаттин ашқан. Буниң билән уйғур дияри хитай һөкүмитиниң «асаслиқ ток енергийә томури», «дуня бойичә әң зор миқдарда ток йәткүзүш қурулуши», «техникилиқ сәвийиси әң юқири болған ток йәткүзүш системиси» дегәндәк тәқдирләшлиригә еришкән. Бу линийәләр арқилиқ хитай өлкилиригә тошулуватқан ток миқдари хитай миллий ишләпчиқириш омуми қиммити (GDP)гә һәр йили 13 милярд сом (тәхминән икки милярд америка доллири) қиммәт қошидикән. Нөвәттә бу төт ғол ток линийәси арқилиқ хитайдики 19 өлкә вә биваситә қарашлиқ шәһәргә ток йәткүзүш давам қилмақтикән.

Хәвәрдә ейтилишичә, нөвәттики бу ток йәткүзүш линийәлири бундин кейин давамлиқ кеңәйтилидиған болуп, буни «шинҗаңниң енергийә база қурулушидики зор тәрәққият» дәп тәриплигән.

Һалбуки уйғурлар дияридики йеза-қишлақларда һазирғичә ток линийиси йетип бармиған сансизлиған орунлар болуп, ток мәсилиси милйонлиған уйғур деһқанлириниң бешини қатуруватқан мүшкүлатларниң бири икән. Америкадики мустәқил көзәткүчи елшат һәсән бу тоғрисида сөз қилип «мустәмликичиләрниң байлиқ қезиши тәрәққият әмәс. Чүнки у йәрлик хәлққә һечқандақ мәнпәәт елип кәлгән әмәс. Улар һәрқачан мустәмликә районидики байлиқни қезишни биринчи орунға қойидиған болуп, бу җайдики йәрлик хәлқ яки уларниң турмуши мустәмликичиләрниң нәзиридә мәвҗут болмайду» деди.

Пикирләр (0)
Share
Толуқ бәт