Даириләр “уйғур елиниң токини ичкиригә йәткүзүш” кә алдиримақта

Хитай даирилири уйғур елиниң токи арқилиқ хитай өлкилирини тәминләш қурулушини җиддий елип бармақта.

Тәңритағ торида берилгән хәвәрдин қариғанда, қумулниң боғаз йезисида қурулуватқан 800± киловолтлиқ алаһидә юқири бесимлиқ турақлиқ ток йәткүзүш қурулуши “шинҗаңниң токини шәрққә йәткүзүш” қурулушидики арилиқи әң йирақ ток йәткүзүш қурулуши болуп, қумулниң җәнубидики енергийә базисидин башлинип, 5 өлкини кесип өткәндин кейин җеңҗуда аяқлшидикән. Даириләр ичкирини балдуррақ ток тәминләш үчүн қурулушниң сүритини ашурған.

Алдинқи һәптә, уйғур елидики бәш чоң көмүр базисиниң бири болған ғулҗида қурулған феңхуаң - шиху - ғулҗа ток йәткүзүш қурулушиниң мушу айниң ахири ишқа башлайдиғанлиқи елан қилинған иди.

Уйғур көзәткүчиләр “уйғур елиниң токини ичкиригә йәткүзүш” қурулушиниң уйғур елиниң екологийилик муһитиға салидиған зийинидин қаттиқ әндишә қилмақта. Чүнки, уйғур елиниң токини шәрққә йәткүзүш үчүн, уйғур елидин чиқирилған көмүр өз йеридә көйдүрүлүп, токқа айландурулидиған болуп, һазирқи пиланда йилда сиртқа 165 милярд киловат саәт ток йәткүзүш вә буниң үчүн 80 милйон тонна көмүр көйдүрүш ишқа ашурулидикән.

Дуня уйғур қурултийиниң баянатчиси дилшат ришит бу һәқтә радиомизға баянат бәргәндә, бу пиланни тәнқид қилип, хитай һөкүмитиниң бу арқилиқ көмүр йөткәштики қатнаш қийинчилиқидин қутулуш билән биргә, хитай өлкилириниң муһитини қоғдап қелишни мәқсәт қилғанлиқини билдүргән иди.