Xitay amérikiliq tor buzarlarning hujumigha uchrighanliqini bildürdi

Xitay mudapi'e ministirliqining bayanatchisi géng yenshing peyshenbe küni bergen bayanatida, amérika tor buzarlirining özlirige qarashliq ikki tor betke hujum qilip kelgenlikini bildürdi.

U, mudapi'e ministirliqining resmiy tor béti we xelq azadliq armiyisining xewerler torining ayda ottura hésab bilen 144 ming qétim xakkirliq hujumigha uchraydighanliqini, buning 62 pirsentini amérikidin kelgen hujumning teshkil qilidighanliqini éytti.

Birleshme agéntliqining éytishiche, xitayning bu bayanati amérikidiki tor xewpsizliki shirkiti “Menda'int” ning xitay heqqidiki bayanati bilen munasiwetlik. Mezkur shirket yéqinda amérika hökümet apparatlirigha, shirket we axbarat orunlirigha, ammiwi jem'iyet tor betlirige qilin'ghan hujumning xitay azadliq armiyisining kontrolluqida élip bérilghanliqini pash qilghan idi.

Bayanatchi ging yenshing bügün “Bashqilargha oxshash xitaymu tor hujumining ziyinigha uchrawatqan bir dölet” dédi. Xitay da'iriliri menda'int shirkitige bergen jawabidimu ularning tekshürüsh netijisini “Asassiz” dep körsitip, xitay armiyisining weqe bilen chétishliqi yoqluqini ilgiri sürgen idi.