Президент трампниң америкидики хитай оқуғучилириниң мутләқ көп қисми “хитайниң җасуси” дегәнлики илгири сүрүлди

Америка президенти доналд трампниң йеқинда бир қисим америка ширкәтлириниң мәсуллири билән көрүшкәндә америкидики мутләқ көп қисим хитай оқуғучилирини хитайниң “җасуси” дегәнлики илгири сүрүлди. Президент трамп 7‏-авғуст күни невҗерсей штатидики бир голф мәйданида бир қисим америка ширкәтлириниң мәсуллирини қобул қилип, уларниң “америка иқтисади әһвали вә кәлгүсидә қилидиған хизмәтниң муһим нуқтилириға” даир пикирлирини аңлиған.

“политико гезити” ниң учришишқа иштирак қилған бирәйләнниң сөзини нәқил кәлтүрүшичә, президент трамп кәчлик зияпәттә униң “бу дөләткә оқуғили кәлгән һәр бир оқуғучиси җасус” дегән. Хәвәрдә, юқириқи бирәйлән президент трампниң хитайни тилға алмиған болсиму, әмма униң хитайни көздә тутқанлиқи ениқ икәнликини билдүргән.

Нөвәттә америкида оқуватқан хитай оқуғучилириниң америкидики чәтәллик оқуғучиларниң 3 дән бир қисмини тәшкил қилиду. Америка федератсийә тәкшүрүш идариси бу йил 2‏-айда америка дөләт мәҗлисидә бәргән гуваһлиқ сөзидә, америка илмий тәтқиқат саһәсиниң хитай оқуғучилири вә илмий хадимлири мәсилисидә бәк садда икәнликини, хитайниң “пүтүн америка җәмийити үчүн тәһдиткә айланғанлиқи” ни билдүргән иди.

“политико гезити” ниң баян қилинишичә, президент трамп кәчлик зияпәттә йәнә ши җинпиңниң “бир бәлвағ, бир йол” сияситиниң дуня содисиға һақарәт вә бузғунчилиқ елип келидиғанлиқи, ши җинпиң билән көрүшкәндә буни униңға йүзтуранә ейтқанлиқини билдүргән. Хәвәрдә қәйт қилинишичә, президент трамп йәнә америкиниң 50 милярд долларлиқ хитай експорт мәһсулатиға таможна беҗи қоюшиға қарита хитайниң өч елиш тәдбири қолланғанлиқидин һәйран қалғанлиқи вә қаттиқ ғәзәпләнгәнликини тәкитлигән. Невҗерсей штатидики кәчлик зияпәткә америкиниң боең, кока-кула, фят-крислер қатарлиқ ширкәтләрниң мәсуллири иштирак қилған.