Prézidént trampning amérikidiki xitay oqughuchilirining mutleq köp qismi “Xitayning jasusi” dégenliki ilgiri sürüldi

Amérika prézidénti donald trampning yéqinda bir qisim amérika shirketlirining mes'ulliri bilen körüshkende amérikidiki mutleq köp qisim xitay oqughuchilirini xitayning “Jasusi” dégenliki ilgiri sürüldi. Prézidént tramp 7‏-awghust küni néwjérséy shtatidiki bir golf meydanida bir qisim amérika shirketlirining mes'ullirini qobul qilip, ularning “Amérika iqtisadi ehwali we kelgüside qilidighan xizmetning muhim nuqtilirigha” da'ir pikirlirini anglighan.

“Politiko géziti” ning uchrishishqa ishtirak qilghan bireylenning sözini neqil keltürüshiche, prézidént tramp kechlik ziyapette uning “Bu döletke oqughili kelgen her bir oqughuchisi jasus” dégen. Xewerde, yuqiriqi bireylen prézidént trampning xitayni tilgha almighan bolsimu, emma uning xitayni közde tutqanliqi éniq ikenlikini bildürgen.

Nöwette amérikida oquwatqan xitay oqughuchilirining amérikidiki chet'ellik oqughuchilarning 3 den bir qismini teshkil qilidu. Amérika fédératsiye tekshürüsh idarisi bu yil 2‏-ayda amérika dölet mejliside bergen guwahliq sözide, amérika ilmiy tetqiqat sahesining xitay oqughuchiliri we ilmiy xadimliri mesiliside bek sadda ikenlikini, xitayning “Pütün amérika jem'iyiti üchün tehditke aylan'ghanliqi” ni bildürgen idi.

“Politiko géziti” ning bayan qilinishiche, prézidént tramp kechlik ziyapette yene shi jinpingning “Bir belwagh, bir yol” siyasitining dunya sodisigha haqaret we buzghunchiliq élip kélidighanliqi, shi jinping bilen körüshkende buni uninggha yüzturane éytqanliqini bildürgen. Xewerde qeyt qilinishiche, prézidént tramp yene amérikining 50 milyard dollarliq xitay éksport mehsulatigha tamozhna béji qoyushigha qarita xitayning öch élish tedbiri qollan'ghanliqidin heyran qalghanliqi we qattiq ghezeplen'genlikini tekitligen. Néwjérséy shtatidiki kechlik ziyapetke amérikining bo'éng, koka-kula, fyat-krislér qatarliq shirketlerning mes'ulliri ishtirak qilghan.