Хитай даирилири уйғур аптоном районида милләтләр ара “туғқанчилиқ” сияситини давамлиқ чоңқурлаштуридиғанлиқини билдүрди

Мухбиримиз әркин
2020-06-01
Share

Хитай даирилири 2017-йилдин бери уйғур аптоном районида кәң көләмлик йолға қоюп келиватқан “милләтләр иттипақлиқи туғқанчилиқ” сияситини техиму чоңқурлаштурушни тәләп қилди.

Бу тәләп уйғур аптоном районлуқ партком даимий комитетиниң 31-май күни чақирилған кеңәйтилгән йиғинида оттуриға қоюлған.

Хитай һөкүмити 2017-йилдин башлап уйғур билән хитай арисидики “қошмақ туғқанчилиқ” ни алға сүрүш намида бир милйондин артуқ хитай әр кадирлирини уйғур аилилиригә орунлаштурған. Бу аилиләрниң нурғунлириниң аилә башлиқлири 2917-йили башланған тутқунда лагерларға қамалған иди.

Уйғур аптоном районлуқ парткомниң кеңәйтилгән йиғинида чен чүәңо сөз қилип, бу сиясәтни давамлиқ чоңқурлаштуридиғанлиқини билдүргән. “тәңритағ” ториниң хәвәр қилишичә, чен чүәңо: “партийәниң милләтләр сияситини омумйүзлүк изчиллаштуруп, миллий территорийәлик аптономийәни давамлаштуруш вә мукәммәләштүрүп, ‛милләтләр иттипақлиқи туғқанчилиқи‚ вә милләтләр иттипақлиқи бирләшмә паалийәтлирини күчәйтиш керәк шундақла һәр қайси милләтләрниң өз ара берип-келиши, алақиси вә қошулушини давамлиқ чоңқурлаштуруш керәк,” дегән.

Чен чүәңо йиғинда “туғқанчилиқ” вә “намратлиқтин қутқузуш” ни өз ичигә алған 9 нуқтилиқ хизмәт пиланини оттуриға қойған. Лекин диққәт қиларлиқ йери, у 9 нуқтилиқ мәзкур хизмәт пиланида “террорлуқ” вә “әсәбийлик” мәсилисини тилға алмиған. Һалбуки, хитай һөкүмити 3 милйондәк уйғурни лагерларға қамап, уйғурларниң тили, мәдәнийити, диний етиқади вә турмуш усулини чәкләһстә аталмиш “террорлуқ” вә “әсәбийлик” ни баһанә қилип кәлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт