Пакистандики уйғурларниң “туғқанлар сөһбити” өткүзүлди

Мухбиримиз әзиз
2021-12-22
Share

Хитай һөкүмитиниң йеқинқи мәзгилләрдики уйғур муһаҗирлирини тәшвиқатқа селиш һәрикити нөвәттә пакистанда уюштурулған “уйғур муһаҗирлириниң туғқанлар сөһбити” дә йәнә бир қетим әкс әтти.

Хитай һөкүмити башқурушидики шинхуа агентлиқиниң 22-декабирдики хәвиридә ейтилишичә, пакистандики хитай әлчиханиси уюштурған бу қетимқи паалийәттә пакистандики уйғур муһаҗирлар “америка башчилиқидики хитайға қарши күчләрниң суйиқәсти әмәлгә ашмайду” дегән мәзмунда сөз қилған. Уларниң үрүмчидики туғқанлири болса видийолоқ сөһбәттә өзлириниң қандақ “бәхтияр вә шадиманлиқ ичидә яшаватқанлиқи” ни сөзлигән. “гилгит-пакистан хитай муһаҗирлири бирләшмиси” ниң рәиси абдуқәйюм миҗит өзиниң қәшқәрдә туғулуп өскәнликини, шуңа бу маканни бәк яхши билидиғанлиқини тәкитлигән. У бу һәқтә сөз қилип “шинҗаңда аз санлиқ милләтләрниң мәдәнийәт һәқлири толуқ капаләткә игә. Диний етиқадта һечқандақ чәклимә йоқ. Мәсчитләрниң шараити бәк яхши” дегән.

Һалбуки бу йиғинда уйғур диярида уйғур тилиниң мәктәпләрдики мәни қилинған тилға айлинип қалғанлиқи, диний етиқадқа четишлиқ һәрқандақ паалийәт билән шуғулланған кишиләрниң “террорлуқ вә ашқунлуқ” қа бағлинип лагерларға йоллинидиғанлиқи, шундақла йүзлигән мәсчитләрниң чеқип ташланғанлиқи һәққидә бир еғизму сөз болмиған.

Мәлум болушичә, бу хил тәшвиқат паалийәтлириниң бир муһим нишани пакистан аһалиси болуп, хитай һөкүмити мушу арқилиқ өзлириниң қандақ “яхши һакимийәт” икәнликини давраң қилмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт