Xitay Uyghur élida “Tümen karxana arqiliq tümen kentni güllendürüsh” herikitini resmiy ishqa kirishtürgen

Muxbirimiz irade
2022.06.16
Share on WhatsApp
Share on WhatsApp

Xitay hökümitining Uyghurlargha qaritiwatqan mejburiy emgek siyasitige taqabil turush üchün amérika bilen yawrupa ittipaqi heriketke ötüwatqan bir peytte, xitay da'iriliri Uyghur élida “Tümen karxana arqiliq tümen kentni güllendürüsh” dep nam bérilgen bir heriketni bashlighan.

“Tengritagh tori” ning xewirige qarighanda, da'iriler mushu ayning 13-14-künliri xotende Uyghur aptonom rayonning “Tümen karxana arqiliq tümen kentni güllendürüsh” herikitini ilgiri sürüsh yighini teshkilligen. Bu yighinda bu heriketning “Partiyening yéngi dewrdiki shinjangni idare qilish istratigiyesini toluq yolgha qoyushining kapaliti ikenliki”, “On ming kentke yardem béridighan on ming karxana” herikitini dawamliq qanat yaydurup, téximu köp karxanilarni rayon'gha jelp qilish, righbetlendürüsh, shundaqla karxanilar bilen yerliktiki kentlerni bir-birige baghlash zörürlüki tekitlen'gen.

Xewerde mezkur heriketning 2016-yildin bashlap bashlighanliqi we xoten wilayitige yerleshken 1747 xususiy karxanining 2157 kentke “Yardem bergenliki” tilgha élin'ghan.

Xitay hökümiti yéqinqi yillardin buyan, “Ishik aldida ishqa orunlishish”, “Zawut-karxanilarni ishik aldighiche ekilish”, “A'ile ayallirini kesp igisige aylandurush” dégendek namlar bilen eslidinla déhqanchiliq, qol hünerwenlik we tijaret bilen shoghullinip kelgen Uyghur déhqanlirini xitay karxanilirigha baghlinip ishleydighan mejburiy emgekchilerge aylandurushqa urunup kelmekte.

“Kommunizm ziyankeshlikige uchrighuchilar xatire muziyi” tetqiqatchisi adriyan zénz yéqinda “Zémistan” torigha qilghan sözide xitay hökümitining Uyghur mejburiy emgiki siyasitini dawamlashturushla emes, belki uni yenimu kücheytip, kéngeytip yürgüzüwatqanliqini bildürgen. U yéqinda bu heqtiki eng yéngi tetqiqat netijilirini “Jeymis town fondi jem'iyiti” tor béـtide élan qilghan bolup, yéqinqi tereqqiyatlar xitay hökümitining Uyghur élida yenimu köp ademni mejburiy emgekchilerge aylandurush meqsitini namayen qilip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.