Хитай дөләт рәиси ши җинпиң туңган мусулманлирини зиярәт қилип партийиниң дин сияситидә чиң турушни тәкитлигән

Мухбиримиз ирадә
2016.07.21
Share on WhatsApp
Share on WhatsApp

Шинхуа ториниң хәвиридин мәлум болушичә, хитай дөләт рәиси ши җинпиң ниңшядики туңган мусулманлирини зиярәт қилип, милләтләр иттипақлиқи һәм шундақла партийиниң дин сияситидә чиң турушни тәкитлигән.

Ши җинпиң 18-июлдин 20-июлғичә давам қилған зиярити җәрянида ниңшя туңган аптоном райониниң йинчүән шәһиридики мәсчитләрни зиярәт қилип, диний затлар билән көрүшкән. Ши җинпиң у йәрдики амма билән көрүшкәндә сөз қилип “партийиниң дин сияситидә чиң турушни, диний паалийәтләрни қанун асасида елип беришни вә динни сотсиялистик җәмийәткә маслаштуруш” ни тәкитлигән.

Ши җинпиңниң туңган мусулманлириға қаратқан бу мәхсус зиярити көзәткүчиләрниң диққитини қозғиди. Австралийә ла троп университетиниң профессори җәймис лейболд бу һәқтә тивиттер торида қилған сөзидә, ши җинпиңниң зиярити һөкүмәтниң туңган мусулманлириниң радикаллишиш әһвалидин әндишә қиливатқанлиқини ениқ көрситип бериду, деди.

Хитайдики туңганлар диний һоқуқлиридин уйғур мусулманлириға қариғанда көп әркин һалда бәһримән болидиғанлиқи, хитайда уйғурлар вә туңганларға пәрқлиқ муамилә қиливатқанлиқи хәлқарадики кишилик һоқуқ органлириниң доклатлиридиму тилға елинған. Бирақ, америкидики фростбург университетиниң хитай ишлири мутәхәссиси, профессор ма хәййүн әпәнди бизгә қилған сөзидә, йеқиндин буян хитай һөкүмитиниң уйғур елигә қаратқан диний бесим сияситиниң ниңшядиму көрүлүшкә башлиғанлиқини ейтқан иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.