Xitay hökümitining diniy jehettiki teqibliri tungganlarghimu jiddiy kéngeymekte

Uyghurlar diyarida ewj éliwatqan “Esebiylikke we térrorluqqa zerbe bérish herikiti” de Uyghurlarning diniy étiqadi izchil muhim hujum nishani bolup kelgenidi.

Yéqinda bu xildiki diniy ziyankeshlikning tungganlar rayonigha jiddiy kéngiyiwatqanliqi köp tereplime shekilde melum bolushqa bashlidi.

“Zimistan” zhurnilining muxbiri gensudiki bir tunggan meschitining imami bilen mexsus söhbette bolghanda imam uninggha meschitning alliqachan kompartiyening teshwiqat merkizi bolup qalghanliqini sözlep bergen. Meschitte qerellik halda dölet bayriqi chiqirilidighan bolup, meschit tamlirigha xitay kompartiyesining teshwiqatliri ésilghan.

Muxbirning diqqitini tartqan yene bir nuqta bu jaydiki erebche til öginish pa'aliyetliri birdek cheklen'gen. Imamlarningmu erebche til ögitishi men'i qilin'ghan. Buninggha qoshulup yéqindin buyan gensu tewesidiki mollilargha bérilidighan guwahnamilerni shu kishining kompartiyege bolghan sadiqliq derijisige qarap tarqitish yolgha qoyulghanliqtin imamliq guwahnamisi alghanlarning sani barghanséri azlap mangmaqta iken.

Imamning muxbirgha sözlep bérishiche, ötken bir yil ichide ningshyadiki köpligen meschitlerning ay-yultuzluq qubbiliri éliwétilgen. Imam bu ehwal heqqide söz qiliwétip: “Eger ishlar mushu yosunda dawam qilsa biz markisizimchilar éytqan ‛din haman bir küni jem'iyettin ghayib bolidu‚ dégen hökümning emeliyitini köridighan oxshaymiz” dégen.

Ningshya uniwérsitétining yéqinda ramizanda roza tutqan ikki tunggan oqughuchigha qattiq agahlandurush jazasi bérish heqqidik qizil bashliq höjjitimu bu ehwalni testiqlaydu. Xitaydiki tunggan ziyaliyliridin enren bu heqte söz qilip: “Bu xitayning asasiy qanunigha pütünley xilap bolghan qilmish” dep körsetken.