Türkiyening höriyet gézitide rabiye xanimning türk saqchilirigha minnetdarliq xéti xewer qilindi

Bügün türkiyening aldinqi qatardiki chong gézitliridin bir bolghan “Höriyet” gézitide dunya Uyghur qurultiyi re'isi rabiye qadir xanimning türk saqchilirigha qaritip yazghan minnetdarliq xéti xewer qilindi. Mezkur xette, türk saqchilirining réyna térrorchisini tirik qolgha chüshürgenlikige apirin oqulghan. Xewerde mezkur xettin neqiller bérilgen bolup, türk saqchiliri bilen xitay saqchiliri sélishturulghan. Sélishturmida xitay saqchilirining Uyghur rayonidiki atalmish térrorluqqa qarshi herikitide qolida aptomatik qorali bolmighan gumandarlarni neq meydanda étiwétip barghanliqini eslitip ötken rabiye xanim, türk saqchilirining yénida qorali bolush we özini her waqit partlitiwélish éhtimali bolghan bir térrorchini, bir pay oq chiqarmay tirik tutqanliqini “Bu yalghuz, maharet we tejiribe mesilsi emes, eyni waqitta qanuniy we insaniy exlaq mesilisi” dep medhiyeligen. Hüriyet gézitining xewiridiki neqillerdin biride yene, rabiye xanim Uyghurlarning türkiyedin xuddi burunqidek, buningdin kéyinmu siyasiy, ijtima'iy we medeniyet saheliride yardem kütidighanliqi, emma Uyghurlar üchün buningdinmu muhimi türk dölitining öre turushi we türk xelqining amanliqi ikenliki bayan qilghan.

Bu rabiye xanimning réyna térrorluq weqesi yüz bergendin kéyin, türk xelqighe xitaben yazghan ikkinchi qétimliq bayanatidur, rabiye xanim aldinqi qétimliqida térrorchining Uyghur bolush éhtimalliqi heqqidiki xewerlerge jawaben, eger térrorchining kimlikide Uyghur dep yézilghan bolsimu, uni Uyghur déyishke bolmaydighanliqini, chünki Uyghurlarning xitay ishghaliyetchilirini düshmen dep qaraydighanliqini eskertken.