Türkiye rus uchquchining jesitini qayturup béridighanliqini bildürdi

Muxbirimiz ümidwar
2015-11-29
Share


Türkiye bash ministiri exmet dawutoghlu türkiye armiyisi teripidin étip chüshürülgen rusiyening SU - 24 tipliq bombardimanchi ayropilanning uchquchisi olég péshkowning jesitini rusiye terepke tapshurup béridighanliqini bildürgen.

Roytérs agéntliqining xewer qilishiche, exmet dawutoghlu türkiyening xatay rayonidiki prawslaw dini muritlirining mezkur uchquchi üchün diniy qa'idilerni béjirgenliki, rusiye terepning telipi boyiche jesetni rusiye terepke qayturup béridighanliqini eskertken.

B b s agéntliqining xewer qilishiche, rusiyening enqerediki elchixanisining herbiy wekili igor mitakow rus uchquchining jesitini enqere ayrodromida rusiye bash elchisi we elchixana xadimlirining tapshuruwalidighanliqini éytqan bolsimu, emma jesetning qachqan élip kélinidighanliqi éniq emeslikini bildürgen.

SU - 24 Tipliq rusiye bombardimanchi ayropilani 24 - noyabir küni türkiye hawa armiyisining hujumchi ayropilani teripidin étip chüshürülgen bolup, türkiye terep rusiye ayropilanining agahlandurushqa qulaq salmay türkiye tewelikige kirgenlikini éytqan, emma rusiye terep bolsa rusiye ayropilanining süriye chégrasi ichide ikenlikini körsetken.

Mezkur weqedin kéyin türkiye - rusiye munasiwetliri birdinla jiddiyliship ketken bolup, rusiye prézidénti putin shenbe küni türkiyege qarita émbargo qoyidighanliqini jakarlidi. Rusiye terep rusiye puqralirining türkiyege sayahetke barmasliqi, türkiye soda shirketlirining rusiyediki pa'aliyetlirige qarita munasiwetlik cheklimilerni qoyush, türkiye mehsulatlirining rusiyege kirishige cheklime qoyush, rusiye - türkiye arisidiki wizisiz tüzümni bikar qilish we bashqilarni élan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet