Türkiyening rusiyening hawa mudapi'e sistémisini sétiwélish söhbiti axirqi basquchqa kirgen

Muxbirimiz jüme
2017-04-22
Share

Türkiye dölet mudapi'e ministiri fikir ishqning jüme küni ashkarilishiche, nöwette türkiyening rusiye bilen S-400 tipliq bashqurulidighan bomba qalqan sistémisi üstide élip bériwatqan söhbiti axirqi basquchqa kirgen. Emma u, bu heqte birer kélishimning hasil qilinidighan yaki qilinmaydighanliqi heqqide toxtalmighan.

Türkiyedin chiqidighan “Sabah” gézitining xewer qilishiche, bu heqte toxtalghan ishq ependim mundaq dégen: “Roshenki türkiye bashqurulidighan bomba mudapi'e sistémisigha éhtiyajliq. Emma natogha eza bashqa döletler hazirghiche bahasi muwapiq birer sistémini teminlep baqmidi.”

U yene, rusiye bilen bu heqte ötküzüwatqan söhbetning axirqi basquchqa kélip qalghanliqini bildürgen bolsimu: “Emma bu dégenlik kélishimni etila imzalaymiz, dégenlik emes” dep körsetken.

Türkiyening rusiyedin mezkur sistémini sétiwélish xewiri bu yilning béshida otturigha chiqqan. Eyni chaghda shimaliy atlantik ehti teshkilati- natogha eza türkiyening rusiyedin shundaq bir herbiy téxnikini sétiwélishi bezi riqabetlerni tughduridighanliqi ilgiri sürülgen.

Halbuki, bu heqte toxtalghan ishq ependim rusiyedin sétiwalidighan mudapi'e sistémisini nato teminligen sistémilar bilen arilashturmaydighanliqini bildürgen.

Natogha eza ellerning rusiyedin öz aldigha mudapi'e eslihelirini sétiwélishigha qarita birer cheklime yoq iken.

2015-Yili türkiye xitaydin 3 milyard 400 milyon dollar qimmitidiki bir hawa mudapi'e qalqan sistémisi sétiwélishni pilan qilghan, emma u namelum sewebler bilen mezkur pilanidin waz kechken idi.

Türkiye bu nöwet rusiyedin sétiwélishni pilan qiliwatqan bashqurulidighan bomba sistémisi sodisining emeliylishidighan yaki emeliyleshmeydighanliqi hazirche namelum.

Eger bu soda emeliyleshse bu, türkiye-rusiye mudapi'e munasiwetlirini téximu qoyuqlashturidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet