Türkiye prézidénti erdoghan asasiy qanun layihesini xelq awazigha qoyushni testiqlidi

Muxbirimiz erkin
2017-02-10
Share

Türkiye prézidénti rejep tayyip erdoghan jüme küni türkiyening munazire we talash-tartishtiki yéngi asasiy qanun layihesini imzalap, bu layiheni omumi xelq awazi‏ - “Référandum”gha qoyushni qarar qildi.

Mezkur asasiy qanun layihesi eger omumi xelq awazida maqullansa, türkiyening 1923‏-yili qurulghan parlamént sistémisidiki döletlik qurulmisi özgirip, prézidéntliq tüzümge köchidu. Bu qanun layiheside bash ministirliq tesis qilinmaydu. Prézidént hökümetni biwasite bashquridu. U ministirlarni wezipige teyinlesh yaki élip tashlashta héchqandaq orunning cheklimisige uchrimaydu.

Mezkur qanun layiheside yene, prézidéntqa asasiy qanun mehkimisining mutleq köp qisim ezalirini, türkiye teptish we sotchilar komitétining asasliq ezalirini teyinlesh, urush élan qilish, qoralliq qisimlargha qomandanliq qilish, xam chotni békitish qatarliq ishlarda zor hoquq bérilgen.

Mezkur asasiy qanun layihesini prézidént erdoghanning konsérwatip “Adalet we tereqqiyat partiyesi” otturigha qoyghan. Bu layihe türkiye parlaméntida parlaménttiki 3‏-chong konsirwatip partiye - “Milletchi heriket partiyesi”ning qollishi bilen maqullinip, erdoghanning testiqigha sunulghan. Emma bu layihe parlaménttiki 2‏-chong sotsiyal démokratik partiye‏- “Jumhuriyet xelq partiyesi”ning qarshi turushigha uchrighan. Ular bu asasiy qanun layihesini mustafa kamal ata türk qurghan layiq, sotsiyal jumhuriyet yolidin adashqanliq, dep tenqid qilghan idi. Mezkur asasiy qanun layihesi bu yil 16‏-aprél omumi xelq awazigha qoyulidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet